Məşhur azərbaycanlı futbol hakimi Tofiq Bəhramovun adını daşıdığı Respublika stadionundakı heykəli ağardılıb. Bu, həmin ərazidə abadlaşdırılma işləri gedərkən baş verib.
Mərhum referinin adını daşıyan nəvəsi – Tofiq Bəhramov bununla bağlı AFFA-ya müraciət edib. O, heykəlin əvvəlki rənginə qaytarılması ilə bağlı xahiş edib. Assosiasiya da öz növbəsində bununla bağlı Azərbaycan Gənclər və İdman Nazirliyinə heykəlin əvvəlki rənginə – tunc rənginə qaytarılmasına dair müraciət edib. Bu, müsbət cavablanıb və proses reallaşacaq.
Tofiq Bəhramovun heykəli 2004-cü ilin oktyabrın 13-də adını daşıdığı stadionun qarşısında, 2006-cı il dünya çempionatının seçmə mərhələsində Azərbaycan – İngiltərə görüşündən əvvəl açılıb.