Dünən Bakı vaxtı ilə saat 21:30-da Azərbaycan yığma komandası çarter reysi ilə Şimali İrlandiyanın paytaxtı Belfasta çatıb.
Noyabrın 11-də bu ölkənin yığma komandası ilə qarşılaşacaq millimizin futbolçularının əhval-ruhiyyəsi yüksəkdir. Hamı komandamızın səfərdən xalla dönəcəyinə inanır.
İdmanxeber.com-un məlumatına görə, Bədavi Hüseynov oyunla bağlı fikirlərini səsləndirib: «Biz Şimali İrlandiyaya ən azı 1 xal aparmaq üçün gəlmişik. Belfastdanqayıdanda aktivimizdə azından 8 xalın olmasını istəyirik. Rəqib çox güclüdür. Həm də doğma meydanda oynaması bizə əlavə çətinlik yaradacaq. Bundan başqa irlandlar fiziki cəhətdən güclü və hündürboydurlar. Belə komandalara qarşı oynamaq həmişə çətin olur. Oyunun taleyini standart vəziyyətlər həll edə bilər. Buna görə müdafiədə çox diqqətli olmalıyıq».
Bir müddət əvvəl zədələnən və «Qarabağ»ın Avropa Liqasında PAOK-la son oyununda meydanda olan Bədavi artıq tam sağalıb. Amma digər müdafiəçimiz Rəşad Sadıqovun Bakıdakı son məşqdə zədələnməsi yerinə düşməyib.
Rəşad Sadıqovun zədəli olduğu bir vaxtda Bədavi Hüseynov Robert Prosineçkinin müdafiənin mərkəzində hansı futbolçulara şans verəcəyini bilmədiyini söyləyib: «Mən zədəli olanda həmin mövqedə Rəşad Sadıqovla Maskim Medvedev oynamışdı. Düzü, Maksimin Çexiya ilə oyundakı çıxışı məni yaxşı mənada heyrətləndirmişdi. İndiyə kimi demək olar ki, həmin mövqedə oynamamışdı. Amma bunu hiss etdirmədi. Maksim təcrübəli futbolçudur və təcrübəsinin köməyi ilə müdafiənin istənilən yerində oynaya bilər. Əgər baş məşqçimiz bu dəfə də Maksimə müdəfiənin mərkəzində yer versə, heç kim təəccüblənməsin. Bu, əla seçim olardı».
Sonda Bədavi Hüseynov «Qarabağ»ın futbolçularının hazırda yaxşı formada olduqlarını bildirməklə yanaşı PAOK üzərində qazanılan qələbələrin futbolçularda yüksək əhval-ruhiyyə yaratdığını və bunun yığmanın oyununa yaxşı mənada təsir edəcəyini söyləyib.