“Qarabağ” Çempionlar Liqasının I təsnifat mərhələsinin cavab matçı çərçivəsində sabah Sloveniya klubu “Olimpiya”nı qəbul edəcək.
İdmanxeber.com-un məlumatına görə, Ağdam klubunun çalışdırıcısı Qurban Qurbanov oyundan öncə keçirdiyi mətbuat konfransında jurnalistlərin suallarını cavablandırıb:
– Sloveniyadakı oyundan fərqli sabah heyətdə dəyişiklik gözlənilirmi?
– Dəyişiklik ola bilər. Amma ciddi bir fərq gözlənilmir.
– Macarıstanlı Balaş Dzudzakın “Qarabağ”a keçmək variantı nə dərəcədə realdı?
– Bu, son illərin ən çox verilən sualıdı. Ən çox axtarışda olduğumuz mövqe hücumçdu. Amma dediyiniz oyunçu ilə bağlı məlumatım yoxdu. Bəlkə də, siyahımızda olub. Hücuma ən azı 1 oyuncu cəlb etmək istəyirik. Axtarışlar davam edir.
– Bir neçə oyunçu – Almeyda, Əmirquliyev komandadan getdi, Qara Qarayev ilk oyunda qırmızı vərəqə aldı. Coşqun Diniyevin orta sahədə tək qalması sizi narahat etmir?
– Qaranın qırmızı vərəqə alması barədə indi düşünməyə ehtiyac yoxdu. Yaxşı tərəfini düşünək. İxtiyarında az oyunçu olanda, məşqçi daha rahat qərar verə bilir.
– Almeydanın qış fasiləsində “Astana” variantı olub. Həmin vaxt bunu hiss etmisiniz?
– Almeyda elə futbolçudu ki, danışıq onun oyununa təsir etməz. Mövsümün sonuna bir neçə tur qalmış onun qalmayacağını bilirdim. Komandasını dəyişmək istəyirdi. Buna normal baxırdım. O ki qaldı sualınıza, bunu hiss etməmişəm. Almeyda həmişə maksimum gücünü ortaya qoyub.
– Roman Qriqorçuk “Astana”ya Pedro Enrike və Riçard Almeydanı apardı, nəinki “Qəbələ”də bəyəndiyi Cavid Hüseynov. Bunu düşünəndə sevinmirsiniz ki, mənim əməyimin bəhrəsidi?
– Belə şeylərə az fikir verməyə çalışırıq. “Barselona” pik səviyyədi. Amma Neymar ordan getdi. Futbolda belə hallar olur. Burdan çıxan futbolçulara dəyər verilməsi bizi sevindirir.