“Fan-zonalarda hər şirkət bir məhsul satacaq. Çünki bu bir aylıq tədbirdir. Biz bir məhsulun digər şirkətlər tərəfindən satışının həyata keçirilməsinə imkan verməyəcəyik. İstəmirik ki, orada rəqabət yaransın. İstəyirik ki, tenderdə qalib gələn şirkətlər bu bir ay ərzində satışdan gəlir əldə edə bilsin”.
İdmanxeber.az-ın məlumatına görə, bunu AFFA-nın icraçı vitse-prezidenti və baş katibi Elxan Məmmədov deyib. O, yarış zamanı Bakıda fəaliyyət göstərən restoranların, pabların, kafelərin qiymətləri çox artırmasından narazılığını da bildirib:
“Biz şəhərdə digər iaşə obyektlərinin satış prosesinə qarışa bilmərik. Ancaq qiymətlərin 100 faiz qaldırılması doğru deyil. Fan-zonalarda 50 faizədək qiymət artımı ola bilər. Avropada da belə tədbirlər zamanı qiymət artımı olur. Amma bu, 30 faizdən yuxarı olmur. Biz düşünməliyik ki, turistləri buradan qaçırmayaq. Onlar burada yüksək qiymətləri görüb qorxmasınlar, əksinə Bakıya bir də gəlmək haqqında düşünsünlər”.
13-21 iyun tarixlərində Bakıda AÇ-2020-nin qrup mərhələsinin oyunları keçiriləcək. İyulun 4-də isə 1/4 final mərhələsinin bir oyunu Bakı Olimpiya Stadionunda baş tutacaq.