Müsahibə Ölkə futbolu

Emin Mahmudov: “Erkən qola yaxşı reaksiya verdik”

“Neftçi”nin yarımmüdafiəçisi Emin Mahmudov “Qarabağ”la oyundan (1:1) sonra klubun rəsmi saytına müsahibə verib. Qaçırdığı qol epizodu ilə bağlı danışan təcrübəli futbolçu azarkeşlərimizin komandanın əsas üstünlüyü olduğunu bildirib:
– Təlim-məşq toplanışından sonra “Qarabağ”la oyunda komanda üzvləri özlərini necə hiss edirdi?
– Özümüzü yaxşı hiss edirdik. Ciddi hazırlıq keçmişdik. Fiziki baxımdan da yaxşı idik. Sanki toplanışdan sonrakı ilk matçımız deyildi.
– Mövsümün ikinci hissəsini “Qarabağ”a qarşı oyunla başlamaq nə qədər çətin idi?
– Toplanışdan sonra bütün rəqiblərlə görüşlər çətin keçir. Fərqi yoxdur, “Qarabağ” olsun, ya başqası. Digər oyunlarda da qalib gəlməliyik. Büdrəməyə haqqımız yoxdur. Çünki “Qarabağ”ın büdrəyəcəyinə inanmıram.
– Erkən qol buraxmağımız nə ilə bağlı idi?
– Oyuna pis başladıq. Deyərdim ki, o qədər də aqressiv başlamadıq. Bununla belə, erkən qola yaxşı reaksiya verdik. Əlimizi yanımıza salmadıq. Məncə, ilk dəqiqələrdə çox arxaya çəkilmişdik. Yaxşı ki, sonra vəziyyəti düzəldə bildik. Artıq ikinci hissədə rəqibi qapısına sıxışdırmışdıq. Azlıqda qalandan sonra isə geri çəkilməyə məcbur olduq.
– Qol vurmaq üçün sizin də gözəl imkanınız oldu…
– Bəli, Platellas məni çox yaxşı gördü. Fikrimcə, hər şeyi düz elədim. Düşünmək üçün vaxt yox idi. Sadəcə, qapıya zərbə endirmək lazım idi ki, bunu da elədim. Bir az dəqiqlik çatmadı. Əminəm ki, top çərçivəyə getsəydi, qol olacaqdı.
– Psixoloji üstünlüyün “Neftçi”nin tərəfində olduğunu demək olar?
– “Qarabağ” indi qəzəblidir. Buna görə də heç bir üstünlükdən söhbət gedə bilməz. Əgər öz oyunumuzu göstərsək, hər şey yaxşı olacaq. Bizim əsas üstünlüyümüz oyun ərzində hiss olunurdu. Bu, azarkeşlərimiz idi.

Oxşar xəbərlər

Elşad Əhmədov: “İkinci qoldan sonra rəqib həvəsdən düşdü”

admin

“Neftçi” “Xəzər Lənkəran”ı məğlub etdi, “Qarabağ” evdə, “Simurq” səfərdə 3 xal qazandı

admin

“Xəzər Lənkəran”da 4 futbolçu əsas heyətdən kənarlaşdırıldı

admin