Sabah Çempionlar Liqasının II təsnifat mərhələsi çərçivəsində “Qarabağ” Gürcüstanın “Samtredia” klubunu qəbul edəcək.
İdmanxeber.com-un məlumatına görə, bu gün Gürcüstan klubunun baş məşqçisi Georgi Tsetsadzenin mətbuat konfransı keçirilib:
– Bakıya gələn futbolçuların hər hansı narahatlığı varmı?
– Xeyr. Heyətimizdəki bütün futbolçular matça tam hazırdı.
– Komandanızın oyunundan razısınızmı?
– Bəli. Komandamın oyunundan razıyam. Bundan öncə də Bakıda oyun keçirmişik. Matça tam hazırıq.
– Ötən il “Qəbələ”yə 1:5 hesabı ilə məğlub olmuşdunuz. Bu, sizi narahat edirmi?
– Keçən ilkiylə müqayisədə komandamız daha yaxşı durumdadır.
– Sabahkı oyunda hansı hesab sizi qane edəcək?
– Bunu sabahkı oyunda görəcəksiniz.
– Azərbaycanda çox vaxt “Qarabağ”la “Qəbələ” müqayisə olunur. Sizcə, bu komandalardan hansı daha güclüdür?
– Məncə, “Qarabağ” daha güclüdür.
– Komanda avrokubokda ev oyunlarını niyə Tiflisdə keçirir?
– Samtrediadakı arena standartlara cavab vermədiyindən, ev oyunlarımızı Tiflisdə keçiririk. Lakin “Dinamo-Arena”nı sırf mənim istəyimlə seçmişik.
– “Qarabağ”da hansı oyunçunu fərqləndirərdiz?
– “Qarabağ” komanda olaraq güclüdü.
– Rəqib yoxlama oyunlarında məğlub olub…
– Bunun mənim üçün heç bir əhəmiyyəti yoxdu. Ümumiyyətlə, yoxlama oyunlarında qeydə alınan nəticə rəsmi oyunlara təsir etmir.