Kamran Ağayev “İnter” – “Kəpəz” matçından sonra müsahibə verib:
– “İnter”də debüt oyununuzda qələbə qazandınız. Oyun haqda fikirlərinizi bildirərdiniz…
– Əsas odur ki, zədəli deyilim. Artıq özümü bərpa etmişəm. Debütüm pis alınmadı. Son dəfə üç ay əvvəl oynamışdım. Əsas nəticə idi ki, onu da qazandıq. Bir neçə zədəli oyunçumuz var. Onlar qayıdandan sonra yəqin ki, daha da güclü çıxış edəcəyik.
– Türkiyə macəralarınızdan sonra “İnter”ə uyğunlaşmağınız çətin olmadı?
– Bilirsiz, mən həmişəm demişəm ki, Azərbaycan klublarına adaptasiya olmaq çətin deyil. Çünki bura mənim vətənimdir. Tanıdığım futbolçulardır. Bir neçə legioner ola bilər ki, onları tanımaya bilərəm. Amma bu da normaldır. Mən artıq təcrübəli qolkiperəm. Türkiyədə də adaptasiya olmağa çətinlik çəkmirdim. Artıq kifayət qədər yaşım var. Düzdür, qapıçı üçün yaşım çox deyil. Amma yenə də hər şeyə hazıram.
– Adət etmişik ki, Kamran Ağayev həmişə çempionluğa oynaya klubda çıxış etsin. Sizcə, “İnter”in şansları var?
– Xalların sayına baxanda kifayət qədər xalımız var. Bizim öz oyun üslubumuz var. Artıq uzun illərdir ki, “İnter” bu taktika ilə çıxış edir. Amma bu demək deyil ki, biz çempionluğa oynamırıq. Xeyr, “İnter” böyük klubdur.
– III dövrədə ilk qələbənizi qazandınız. Artıq “qara zolaq”dan çıxdığınızı demək olar?
– Bu, futboldur. Hər zaman müxtəlif nəticələr qeydə alınır. Heç kim sığortalanmayıbdı. 90 dəqiqə vuruşmaq lazımdır ki, istədiyin nəticəni əldə edə biləsən. “Kəpəz” bu mövsüm Premyer Liqaya gəlsə də, öz sözünü demiş klubdur. Gəncə təmsilçisinin heyətində Bəxtiyar Soltanov, Namiq Ələsgərov və Tərlan Quliyev kimi oyunçular çıxış edir. Bir sözlə, çempionatda zəif komanda yoxdu.
– Türkiyəyə yenidən qayıtmaq ehtimalınız var?
– “İnter”lə 6 aylıq müqaviləm var. Hal-hazırda bu komandanın uğurları üçün çalışıram.Zədəli olduğum üçün Türkiyəyə yollanmadım.
– “Karşıyaka” ilə probleminiz qalıb?
– Xeyr problem yoxdu. Hətta alacağım pulu götürmədim.
– Millimizin Qazaxıstanla yoldaşlıq oyunu və Antalya şəhərində təlim-məşq toplanışı olacaq. Milliyə dəvət alacağınızı gözləyirsiniz?
– Hələ ki, həmin toplanışa bir neçə tur qalıb. Hələ bu haqda nəsə demək düzgün olmazdı.
– Elnur Cəfərovun “Real” Ovyedo klubuna baxışa yollanıb. Siz də legioner həyatı yaşamısınız. Bu haqda nə söyləyə bilərsiniz?
– Bu, Cəfərovun şəxsi işidir. Qarışa bilmərəm. Biz də gənc olmuşuq. Amma mən heç vaxt baxışa getməmişəm. Elnur millinin heyətində oynayan futbolçudur. Peşəkar futbolçu birbaşa müqavilə imzalamaq üçün getməlidir. Baxışa yollanmaq üçün yox. Bir zamanlar mən də deyirdim ki, 24-25 yaşıma qədər legioner ola bilməsəm, daha xaricə gedə bilməyəcəm. Amma insan yaşlandıqca hər şeyi başa düşür və anlayır. Çalışırsan ki, ölkə xaricində oynayasan. Fikrimcə, Elnur doğru addım atıb. Amma birbaşa müqavilə imzalasaydı daha yaxşı olardı. Peşəkar olmaq lazımdır.
– Oyunun son dəqiqələrində “Kəpəz” azarkeşləri tərəfə getdiniz…
– Bu, şirin bir dialoq idi. Bir az dodağımın altında danışıram və elə bilirlər ki, söyüş söyürük. Amma bu belə deyil.