“Audit yoxlaması ilə bağlı hələlik yekun qərar verilməyib. Biz də gözləyirik, cavabları nə olacaq?”
İdmanxeber.com-a açıqlamasında bu sözləri “Kəpəz”in icraçı-direktoru Cabir İbrahimov deyib. İbrahimov kluba yeni təyin olunan, lakin təyinatı hələ də rəsmiləşməyən İslam Abbasovun məsələsi barədə də danışıb: “İslam müəllimin təyinatını hələ ötən həftə gözləyirdik. Ancaq bir xəbər çıxmayıb. İnşallah, yaxın günlərdə bütün məsələlər öz həllini tapacaq”.
Azərbaycan Premyer Liqasının 12-ci turu çərçivəsində evdə “Səbail”lə qarşılaşacaq “sarı-göylər”in rəsmisi ot örtüyü ilə bağlı heç bir problemin olmadığını da dilə gətirib: “Ötən həftə “Qarabağ”la oyunda ot örtüyünün sulanmamasına görə cərimələndik. Halbuki bu bizim günahımız deyildi. Çünki ot örtüyünə nəzarət edənlər, bizim işçilərimiz deyildi. Lazımı işlər görülüb, “Səbail”i məğlub etməyi düşünürük”.