“Keşlə”nin sabiq baş məşqçisi Yuri Maksimov Ukraynaya qayıtsa da, Bakıda başına gələnləri unuda bilmir. Klubun Müşahidə Şurasının sədri Zaur Axundovla münaqişə üzündən postundan gedən çalışdırıcı olanları gün üzünə çıxarmaqda davam edir.
– “Baltsan”la oyundan öncə “Keşlə”ylə müqavilə imzalamışdız? Axundov deyir ki, müqavilə hazır idi, imzalamışdım, qalırdi sizin imza atmağınız…
– Xeyr, həmin matçdan öncə müqaviləm yox idi. Rəhbərlik demişdi ki, sözləşmə olacaq, amma olmadı. Müqavilə olsaydı, onlar məni qova bilməzdilər və işləməkdə davam edərdim. Mən onlara dəfərlərlə dedim ki, müqaviləni rəsmiləşdirək, amma üstündən günlər keçdi, heç nə olmadı. Dedilər ki, komandada 20 futbolçu olmasa, müqavilə imzalamayacağıq, Fuad Bayramovla Vaqif Cavadovu göndər.
– Niyə müqavilə imzalamamışdız?
– Müqavilə haqqında onlarla hələ təlim-məşq toplanışında olanda danışmışdım. Hətta özüm imzalayıb onlara göndərmişdim ki, qol çəkib mənə geri qaytarsınlar. Onlar mənə deyirdilər ki, “narahat olma, hər şey yaxşı olacaq”.
– Axundovla problemlər üzündən bir neçə dəfə komandadan getmək istəmisiz…
– Bəli, belə bir şey olmuşdu. 3 dəfə komandadan getmək istəmişdim. Hazır idim ki, ayrılam. Bilirsiz ki, həmişə düzünü demişəm. Məşqlərdə də, oyunlarda da bütün futbolçuların potensialına bələd idim. Amma əgər sənə oyunlar zamanı əvəzetmələr üçün sifariş gəlirsə, bu iş mənlik deyildi. Əsas məsələ də bu idi.
– Fuad Bayramovla Vaqif Cavadovu komandadan göndərməyiniz niyə istənildi?
– Mən onlarla əl sıxmışdım ki, yenidən 1 illik müqavilə imzalayacağıq. İyunun 25-i gələndə gördüm ki, müqavilə hazır deyil. Səbəbini soruşanda dedilər ki, Fuadla Vaqifi göndərməlisən. Sonra onlardan soruşdum ki, bunu niyə edim? Çünki bu idman prinsiplərinə ziddir. Bunu etməyim mümkün deyil.
– Zaur Axundov deyib ki, “kaş Maksimovu kubokun finalından sonra qovardım”…
– Elə bir şey eşitməmişdim. Finaldan 4 gün əvvəl dedilər ki, bizimlə 1 il də işləyərsən? Dedim ki, bəlkə kuboku qazanmadıq. Cavab bu oldu ki, problem yoxdur. Kuboku qazanmasaq da, qal, işlə. Rəhbərlikdə kim olmasından asılı olmayaraq, futbolçularla həmişə münasibətim yaxşı olub, problemim olmayıb. Toplantı oldu və dedilər ki, Fuadla Vaqifi göndər, müqaviləyə qol çəkək. Həmin futbolçulara dedim ki, sizin qovulmağınızı istəyirlər. Yalnız bu halda müqavilə imzalayacaqlar. Amma mən buna razı olmaram, özüm gedərəm ki, siz qalın. Zaur Axundovun yanına getdim və soruşdum ki, mən getsəm, bu oyunçular qalacaq? O da dedi ki, bəli. Ona görə də ayrıldım. Fuadla Vaqifin “torba”sını mənim əlimlə tikmək istəyirdilər, amma alınmadı. Çünki bu hərəkətlərə yol verən biri deyiləm. Hamı ilə sağollaşdım və təşəkkür etdim, postumdan ayrıldım.
– Həmin oyunçular “Baltsan”la cavab oyununda meydana çıxmadılar…
– Bunu dəqiq bilirəm. Əmin idim ki, onlara 1 dəqiqə də olsa, onlara şans verilməyəcək. “Keşlə”də baş məşqçi olmur. Orda baş məşqçi Zaur Axundovun tapşırıqlarını yerinə yetirən fiqurdu. Orda özü düşünən, özü qərar verən baş məşqçi lazım deyil. Oyunlarda elə vaxtlar olub ki, telefonla yanıma adam göndərirdilər ki, filan futbolçunu əvəz elə, filankəsi oyuna daxil et. “Zirə”yə öz meydanımızda uduzurduq. Komandanın rəisi qaça-qaça gəldi ki, “Andre Klennonla Vaqif Cavadovu dəyiş və başqa futbolçunu meydana burax. Bu, Zaur Axundovun tapşırığıdır”. Amma mən bu tapşırığa məhəl qoymadım və hər ikisini meydanda saxladım. Onlar hərəsi bir qol vurdular və biz həmin matçda qalib gəldik. Baş məşqçinin işinə “burun soxmaq” lazım deyil.
– Sezar Meza Kolli də “Keşlə”dən getdi…
– Ondan xəbərim yoxdur. Biz qışda komandanı yığanda heyətə 5-6 ay oynamayan futbolçular cəlb edilmişdi. Gördünüz ki, komanda yarım il ərzində nəyəsə nail oldu və ölkə kubokunu qazandı. Uçurumda olan, aşağı liqaya düşməyə yaxın olan komanda son 6 ayda ən çox xal qazanan komanda oldu. Bunlar uğurun sübutları deyil? “Keşlə” üçün tarix yazdıq. Mənim arxamca söyürlər, təhqir edirlər. Amma mən həqiqəti bilirəm və dürüstəm. Futbolçular qarşısında da alnım açıq olub. Oyunçuları aldatmaq mümkün deyil. Onlar əla bilir ki, kim məşqlərdə yaxşıdır və meydanda olacaq. Futbolçuları zərbə altına qoya bilmərəm. Məşq edən və nəticə gətirən onlardır. Hansısa yoldan keçən və vəzifəyə gətirilən rəhbərin tapşırığını yerinə yetirən adam deyiləm. Məni heç kim əllə idarə də bilməz. Tez-tez onlardan soruşurdum ki, siz nəticəyə cavab verirsiz? Deyirdilər ki, “yox”. Ona görə də işimə qarışmamalarını istəyirdim. (futbolinfo.az)