DÇ-2014-ün seçmə mərhələsində keçirilən İsrail – Azərbaycan oyununda milli komandamızın yeganə qolunu “Xəzər Lənkəran”ın futbolçusu Rahid Əmirquliyev vurdu.
Klubun rəsmi saytına istinadən verdiyimiz məlumata görə, komandanın yarımmüdafiəçisi yığmada keçirdiyi 31-ci matçında ilk qoluna imza atdı. Bunlardan 15-i dünya və Avropa çempionatlarının seçmə oyunlarıdır.
Ramat-Qanda baş tutan qarşılaşmayadək “Xəzər Lənkəran”ın futbolçuları ölkəmizin əsas milli komandasında 4 qol vurmuşdu. Əmirquliyev cənubluların yığmamız üçün qol vuran 5-ci oyunçusu oldu.
Maraqlıdır ki, bu qollardan 2-si cari seçmə mərhələyə təsadüf edib. Belə ki, DÇ-2014-ün seçmə mərhələ oyunlarında yığmanın vurduğu 4 qola hamıdan çox – 2 topla “Xəzər Lənkəran” töhvə verib. İsraillə ötən il sentyabrın 7-də Bakıda keçirilən və indiki kimi 1:1 hesabı ilə başa çatan qarşılaşmada qolu Ruslan Abışov vurmuşdu. 365 gün əvvəl o da “ağ-yaşılların üzvü idi.
Millidə “Xəzər Lənkəran” təmsilçisinin ilk qolu 2005-ci ildə qeydə alınıb. Mayın 29-da Tehranda İran yığması ilə yoldaşlıq oyununda Alim Qurbanov millinin qolunu vurub. Lakin bu qol komandamıza məğlub olmamaq üçün kifayət etməyib – 1:2.
2007-ci il iyunun 6-da “Xəzər Lənkəran”lı futbolçular seçmə mərhələlərdə ilk qolunu vurub. Almatıda Qazaxıstanla 1:1 hesablı heç-heçə edən yığmamız Vüqar Nadirovun qolu ilə xal qazanmışdı.
2012-ci il isə “Xəzər Lənkəran”ın yığmadakı təmsilçiləri üçün daha məhsuldar keçib. Ruslandan başqa, Branimir Subaşiç də rəqib qapısına yol tapıb. Milliləşən serbiyalı avqustun 15-də Bəhreynlə Bakıdakı yoxlama oyununda fərqlənməklə 3:0 hesablı qələbəyə töhfə verib.