18 yaşadək oğlan basketbolçulardan ibarət Azərbaycan millisi Avropa çempionatının C divizionunun qalibi olub.
İdmanxeber.com-un məlumatına görə, San-Marinoda keçirilən yarışın final matçında yığmamız Andorraya qalib gəlib.
Son çempionla qrupda da üz-üzə gələn Tahir Baxşıyevin yetirmələri ilk matçda aldığı 59:69 hesablı məğlubiyyətin əvəzini finalda çıxmağa müvəffəq olub. Belə ki, ilk üç hissədə rəqibindən güclü olan millimiz 74:57 (12:11, 20:13, 19:8, 23:25) hesabı ilə qalib gəlib.
Bu qələbədə ən çox pay sahibi olan Endar Poladxanlı 24 xal toplayıb. O və komanda yoldaşlarının səyi nəticəsində C divizionunda Avropa çempionu olan millimiz turnirdə keçirdiyi 5 oyunda ardıcıl 4-cü qələbə ilə bu uğura imza atıb.