AFFA-nın İntizam Komitəsinin bu gün keçirilmiş iclasında Azərbaycan Premyer Liqasının 27-ci turunun “Zirə” – “Neftçi” oyununda (2:2) qonaq komandaya texniki məğlubiyyət (0:3) verilməsi haqqında qərar qəbul edilib.
İdmanxeber.com-un məlumatına görə, oyunun 68-ci dəqiqəsində Ruslan Abışovun əvəzinə meydana Huqo Barqasın daxil olması ilə legioner limitinin pozulması buna səbəb olub. “Neftçi” klubu bununla bağlı açıqlama yayıb. Açıqlamada qeyd olunur:
“Neftçi” PFK olaraq AFFA-nın İntizam Komitəsinin qərarına hörmətlə yanaşırıq və buna etirazımız yoxdu. Təəssüf ki, legioner limiti olan çempionatlarda bəzən bu cür səhvlər olur. Bu səhvə görə əsas komandanın məşqçilər heyəti cərimələnəcək”.