19 Oktyabr 2019
  • Ana səhifə
  • Kateqoriyasız
  • “Neftçi”nin prezidentinə açıq məktub: “Bu cür addım atmağınız qeyri-peşəkarlıqdır”
Kateqoriyasız

“Neftçi”nin prezidentinə açıq məktub: “Bu cür addım atmağınız qeyri-peşəkarlıqdır”

“Neftçi”nin prezidenti Kamran Quliyevin klubun keçmiş İT mütəxəssisi Kamran Abdullayev barədə Bakı şəhər Baş Polis idarəsinə şikayət ərizəsi verməsindən xəbərdarsınız.

Bu gün Kamran Abdullayev “Neftçi”nin prezidentinə açıq məktub yazıb. Məktubu olduğu kimi təqdim edirik:

 

                                                  Neftçi PFK-nin Prezidenti Kamran Quliyevə

Həmin klubda 08.2015 – 04.2018-ci il tarixlərində xidməti müqavilə

əsasında fəaliyyət  göstərən Kamran Abdullayev tərəfindən

 

AÇIQ MƏKTUB
Hörmətli Kamran bəy!

 

Bir neçə gün öncə KİV və veb portallar vasitəsilə haqqımda yayılan yalan və əsassız ittihamlarla üzləşdim, hətta bununla əlaqədar bəzi KİV nümayəndələri mənimlə birbaşa əlaqə saxlayıb mənim bu vəziyyətlə əlaqədar şərhlərimi istəmişdilər. Belə olduğu təqdirdə, öz mövqeyimi tam və dolğun şəkildə ifadə etmək qərarına gələrək sizə açıq məktub vasitəsilə müraciət edirəm.

 

Məktubun məqsədi, vəziyyəti olduğu kimi qərəzsiz şəkildə izah edərək, mənə qarşı sürülən yalan və əsassız ittihamlara son qoymaqdır.

 

Bildiyiniz kimi, 2018-ci ilin mart ayında müqaviləmə xitam verilməsi barədə sizə öncədən müraciət etmişdim. Yəni, KİV-lərə söylədiyiniz kimi olmayıb, məni heç kim işdən çıxarmayıb, əksinə, mən özüm işdən çıxacağım tarixdən bir ay öncə sizə yazılı şəkildə müraciət edərək işdən çıxacağım haqqında sizi məlumatlandırmışam. Məlumat üçün qeyd edim ki, 1 ay müddət bitdikdən sonra işimi tərk etdiyim zaman kadrlar şöbəsindən mənə işlərimin təhvil verilməsi haqqında imzalamaq üçün heç bir təhvil-təslim aktı təqdim olunmamışdır. İş kompüterimi və lazım olan digər bütün məlumatları təhvil verdikdən sonra mənim son məvacibim maaş kartıma otuzdurulmuşdur. Bunu Bank ödəniş sənədlərinin tarixi də təsdiqləyir.

 

Artıq yeni iş yerimdə işlədiyim zaman 07.08.2018-ci il tarixində siz mənimlə əlaqə saxlayaraq “neftchipfk.com” saytının “domain name” admin panelinin login və parolunu yenidən sizə təqdim etməyimi istədiniz. Bundan sonra qeyd edilən login və parolu klubun əməkdaşına təqdim etmişəm və sizə də bu barədə məlumat vermişəm. Buna sübut olaraq, lazım olduğu halda həmin əməkdaş və sizinlə olan yazışmanı təqdim edə bilərəm. Anladığım qədər, həmin vaxtdan uzun zaman keçməsinə baxmayaraq, “neftchipfk.com” saytının “domain name” admin paneli ilə heç bir əməkdaş məşğul olmamış və üstəlik, təqdim etdiyim məlumat laqeyd yanaşma nəticəsində itirilmişdir.

 

Bundan 1 ilə yaxın vaxt keçdikdən sonra məni sizin göstərişiniz əsasında mütəmadi olaraq klubun nümayəndəsi və hadisələrdən məlumatsız olan hüquqşünası narahat etməyə başlayaraq artıq 1 il öncə təqdim etdiyim məlumatları bir daha verməyimi tələb edirdi. Nəzərə alaraq ki, mən öz tərəfimdən bütün öhdəlikləri yerinə yetirmişdim və həmin məlumatın təkrar olaraq klubun heyəti tərəfindən itirilməsində mənim heç bir günahım yox idi, belə olduğu halda “neftchipfk.com” saytının “domain name” admin panelinin bərpası üçün ödənişli əsasla öz xidmətimi təklif etmişdim, lakin bu çıxış yolu da sizi qane etməmişdir. Yəqin ki, sizin fikrinizcə klubda artıq çalışmamağıma baxmayaraq, bunu təmənnasız etməli idim. Bu azmış kimi, yeni çalışdığım şirkətin rəhbərliyinə bu barədə yazılı müraciət edərək mənim haqqımda yalan və əsassız ittihamlar irəli sürmüsünüz və yuxarıda qeyd etdiyim və həqiqətə uyğun cavabı almışdınız.

 

Növbəti addım kimi siz hüquq-mühafizə orqanlarına mənim barəmdə müraciət etmisiniz və bunu KİV-də işıqlandırmısınız. Həqiqəti bilərək bu cür addım atmağınız ən azı qeyri-peşəkarlıqdır. Mən bunu həm peşəkar fəaliyyətimə, həm də şərəf və ləyaqətimə qarşı təhqir kimi qiymətləndirərək, əks addım atmağa məcburam.
Lakin KİV-də haqqımda yayılan yalan ittihamlara təkzib verildiyi və mənim barəmdə hüquq mühafizə orqanlarına edilmiş əsassız şikayətin geri götürüldüyü təqdirdə, sizin “domain” probleminizi həll etməkdə yardımçı olacam. Əks təqdirdə, mənə qarşı irəli sürülən yalan ittihamlara cavab olaraq qarşılıqlı addımlar atmağa məcbur olacam.

Məlumat üçün qeyd edim ki, hazırkı açıq məktub 3 nüsxədə çap olunmaqla Sizə, AFFA-nın Baş katibi Elxan Məmmədova və KİV nümayəndələrinə təqdim olunacaqdır.

 

Hörmətlə,

Kamran Abdullayev

Bakı şəhəri, 17 Sentyabr 2019-cu il

Oxşar xəbərlər

Bernard Şalland: “Azərbaycan qrupun favoritidir”

admin

Azərbaycanla oyun üçün 26 futbolçu – Macarıstanın heyəti

admin

“Kəpəz” “Qarabağ”a, “Zaqatala” “Neftçi”yə qalib gəldi

admin