Sabah “Bakı” Azərbaycan Topaz premyer-liqasının 26-cı turu çərçivəsində evdə “Qəbələ” ilə qarşılaşacaq.
İdmanxeber.com-un məlumatına görə, bu gün oyunöncəsi son məşqini keçən paytaxt klubunun baş məşqçisi Milinko Pantiç görüş haqda fikirlərini açıqlayıb:
“Günbəgün oyunlar çətinləşir. Artıq turnir cədvəlində rəqibi önləmək üçün şans yaranıb. Cari mövsüm iki dəfə “Qəbələ”yə məğlub olmuşuq. Amma sabah bizi qələbə gözləyir. Eyni zamanda turnir cədvəlinin yuxarı pillələrində qərarlaşan komandalar arasında 1-2 xallıq fərqlər var. Bu isə özlüyündə rəqabəti daha da çətinləşdirir. Əsas rəqiblərlə aradakı xal fərqini aradan qaldırmaq işi məni qorxutmur. Sadəcə, AFFA-nın İcraiyyə Komitəsinin son iclasında növbəti mövsüm aşağı liqaya düşəcək komandanın olmaması haqda verilən qərarın çempionata marağı azaltmasını düşünürəm. Premyer-liqanın ortasında belə bir xəbərin çıxmasını mən heç yerdə görməmişəm. Nisbətən aşağı pillədə olanlar mübarizə aparmalı olduqları halda, bundan sonra ona əhəmiyyət verməyəcək. Marağın azalması bizi qayğılandırır. Ancaq mən neyləyim, dəyişə biləcəyim bir şey yoxdu. Son ana qədər avrokuboklara vəsiqə uğrunda döyüşməliyik”.