29 Sentyabr 2020
  • Ana səhifə
  • Müsahibə
  • “Qarabağ” nəinki Azərbaycanda, eyni zamanda Avropada özünəməxsus bir markadı” – Tahir Gözəl
Müsahibə

“Qarabağ” nəinki Azərbaycanda, eyni zamanda Avropada özünəməxsus bir markadı” – Tahir Gözəl

“Qarabağ”ın prezidenti Tahir Gözəl klubun saytına müsahibə verib.

O, əvvəlcə Çempionlar Liqasının I təsnifat mərhələsində Şimali Makedoniyanın “Sileks” klubu üzərindəki qələbə (4:0) barədə təəssüratlarını bölüşüb:

– Əlbəttə, bu gün komandam qələbə qazandığıma görə çox sevincliyəm. “Qarabağ” 5 aydan çoxdur rəsmi görüşdə meydana çıxmırdı. Amma komandamız təcrübəsini, xarakterini ortaya qoyaraq bu gün qələbə qazandı. Hocamızı, bütün komandamızı təbrik edirəm. Uğurlu başlanğıc hər zaman əsas hədəfə getmək üçün yaxşı motivasiya sayılır. Hələ yolun başındayıq. Oyundan-oyuna performansımızı daha da artıracağımıza inanıram.

– Vurğuladınız ki, 5 ay sonra komanda ilk oyununa çıxdı. Bu qədər uzun müddətdən sonra belə inamlı qələbə gözləyirdinizmi?
– Açığı, mənim üçün komandanın hansı hesabla qələbə qazanmağı heç də əsas deyil. Əla qələbə qazandıq.  Amma bu hesab bizi aldatmamalıdı. Vurulan 4 qol bizi arxayınlaşdırmamalıdı. Və ya bu qələbə heç də asanlıqla qazanılmadı. Futbolçular meydanın hər yerində mücadilə etdilər. Bilirik ki, hələ çox işləməliyik, getdikcə bizi daha çətin qarşılamalar gözləyir. Bugünkü qələbədən məmnunam, amma artıq bu oyunu unudub növbəti matçları fikirləşmək lazımdı.

– Ötən mövsümlə müqayisədə komandada ciddi dəyişikliklər olub. Komanda yenilənib və gəncləşib. Sizin hər zaman fikirlərinizdə gənclərə önəm verdiyinizi görmək olar.
– Əlbəttə, “Qarabağ”da nə qədər çox yerli gənc olsa, bu olduqca yaxşı olar. Bunu mən həmişə vurğulamışam. Amma unutmayaq ki, “Qarabağ” daim hədəfləri olan komandadı. Uğur yolunda təcrübə mühüm amildi. Bilirəm ki, Qurban müəllim mümkün olduğu qədər gənclərə şans verməyə çalışır. Bugün heyətimizdə yetərincə gənc var. Qurban müəllimlə işləmək onlar üçün əla şansdı. Mən inanıram ki, onların gələcəkdə Maksim Medvedev, Qara Qarayev olma şansı var. Bunun üçün üzərlərində çalışmaları və hazır olmalıdılar.

– “Qarabağ”la ənənəvi transfer məsələsi sualı var. Komandada yeni adlar görə biləcəyikmi?
– Biz dəfələrlə demişik ki, transfer məsələlərində bütün səlahiyyətlər komandamızın baş məşqçisi Qurban Qurbanova aiddi. Bilirsiz, mövcud pandemiya səbəbindən transfer məsələləri olduqca mürəkkəbləşib. Həm çempionatlarda qarışıqlıq eyni zamanda, iqtisadi durumlar futbolçu seçimini, transferini qəlizləşdirib. Amma buna baxmayaraq arayışlar davam edir. “Qarabağ” fəlsəfəsinə, duruşuna və tələblərinə uyğun futbolçuları sıramıza qatmağa çalışacağıq.

– “Qarabağ”ın növbəti rəqibi “Şerif” – “Fola” cütünün qalibi olacaq. Bu mərhələdə yenidən, sayca 3-cü dəfə “Şerif”lə qarşılaşma ehtimalı var. Komandamızın bu mərhələdə şansını necə görürsüz?
– Hər nə qədər “Şerif”in şansı yüksək qitmətləndirilsə də, Çempionlar Liqası turnirində matç bitmədən danışmaq düzgün olmaz. Düzdü, “Şerif”in evdə oynadığını nəzərə alsaq, qələbəyə yaxın görünür. Moldovanlarla oynayası olsaq, işimizin heç də asan olmayacağını söyləmək olar. Nəzərə alsaq ki, hər 2 halda “Şerif”i məğlub etmişik, bizimlə qarşılamaya əvəz kimi baxa bilərlər. İstənilən halda mən komandama inanıram. Amma yenə də bu haqda oyundan sonra danışmaq daha düzgün olar.

– Mahir Emreli qol vurduqdan sonra hərbi salam verməklə yadda qaldı. Onun bununla İyul hadisəsi zamanı qəhrəmanları yad etməsini necə qarşıladınız?
– Əlbəttə, bu hadisə  məni çox duyğulandırdı. Artıq 17 ildi “Qarabağ”a rəhbərlik edirəm. Və bu müddət ərzində komandadan tək istəyim olub: “Qarabağ”ın, Azərbaycanın naminə meydana çıxdığınızı unutmayın. Klubda mütəmadi olaraq Qarabağ-Azərbaycan həqiqətlərinin mahiyyəti barəsində iş görülür.  Mahirin bu hərəkəti klubun fəlsəfəsinin, görülən işlərin bariz nümunəsi idi. Əsl “Qarabağ” futbolçusu ölkəsinə, bəşəri hadisələrə duyarlı olmalı və əlindən gələnin ən yaxşısını etməlidi.

– Bu yaxınlarda İyul hadisələri zamanı da “Qarabağ”da oynamış futbolçuların sosial şəbəkələrdə Azərbaycanı dəstəkləməsiylə bağlı təşəkkür ismarıcı vermişdiz. Ümumiyyətlə, klubun bu yöndə davamlı fəaliyyətinin bəhrəsi kimi qiymətləndirmək olarmı?
– Çox sevinirəm ki, komandamızın futbolçuları hansı klubu təmsil etmələrinin fərqindədilər. “Qarabağ”ın formasını geyinən hər bir futbolçu onun hansı bölgəni təmsil etməsini, nəyə xidmət etməsini, formasının “ağır”lığını anlamalıdı. İyul hadisələri zamanı nəinki hazırki eyni zamanda sabiq futbolçularımızın Qarabağa, Azərbaycana sadiqliyini, sevgisini nümayiş etdirdilər. Eyni zamanda 2016-cı il hadisəsi zamanı ordumuzun qəhrəmanlıqları da futbolçularımızın diqqətində və sevgisində idi. Xocalı faciəsi bəşər tarixinin  ən ağır səhifələrindən biridi. 26 fevral günü mənim üçün ən önəmli məsələ komandamla bu hadisə qurbanlarının xatirəsini yad etmək və futbolçuların şüurunda bu hadisəyə xüsusi yer etməkdi. Mənim üçün idman başarılarından daha çox idman əxlaqı, duruşu önəmli olub. Əgər bir klubda bunu formalaşdırsan, başarılar da gələcək. Mən buna həmişə inanmışam. Respublikamızın Prezidenti Cənab İlham Əliyev “Qarabağ”ı qəbul edərkən “Qarabağ”ın idman nailiyyətləriylə yanaşı  duruşunu, mənəviyyatıni xüsusilə vurğulamasını, klubun Qarabağ  həqiqətlərinin dünyaya çatdırılması yönündə spesifik rolunu bildirməsi düzgün yolda olmağımızın göstəricisidi. Bu bizi  qürurlandırmaqla yanaşı yeni hədəflərə kökləyir. Biz mənəvi gücümü adımızdan, ölkə başçısından tutmuş sadə vətəndaşına qədər bir olan inamından alırıq.

– “Qarabağ”ı bu il yenidən qruplarda görə bilərikmi?
– Mənim  komandama inamım hər zaman sonsuz olub. Bəlkə də 10-15 il bundan qabaq kimsə desəydi ki, “Qarabağ” Çempionlar Liqasında oynayacaq, ardıcıl 6 il avrokuboklarda qrup mərhələsində iştirak edəcək heç kim ona inanmazdı. Amma o gün də, bu gün də komandama inanıram. “Qarabağ” artıq nəinki Azərbaycanda, eyni zamanda Avropada özünəməxsus bir markadı.  İnanıram ki, komandamız yenə də inanılmazı bacararaq uğurlu nəticələr əldə edəcək.


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43

Oxşar xəbərlər

Vaqif Cavadov: “Ən çox tənqid olunan futbolçuyam” – MÜSAHİBƏ

admin

Vojislav Stankoviç: “Hamı düşünür ki, “Borussiya” bu qrupun qalibi olacaq, ancaq…” (MÜSAHİBƏ)

admin

Riçard Almeyda AFFA-nın qərarına etiraz olaraq: “Flavinyo olmur, kim olur olsun…” – MÜSAHİBƏ

admin