Mövsümlərarası fasilədə dizindən əməliyyat keçirmiş “Sumqayıt”ın kapitanı Samir Abasov zədəsini sağaldaraq məşqlərini davam etdirir. Komandanın çıxışı haqqında və zədəsindən danışan futbolçu klubun rəsmi saytına açıqlama verib:
“Bildiyiniz kimi, bir müddət əvvəl Rusiyada dizimdən əməliyyat olundum. On günlük istirahətin ardından yüngül məşqlərə başladım. Artıq bir həftədi ki, komanda ilə birgə hazırlaşıram. İndi özümü yaxşı hiss edirəm. Bərpa prosesini tamamlamaq üzrəyəm. İnşallah məşqçilər lazım bilsələr növbəti turda “Qəbələ” ilə qarşılaşmada meydana çıxa bilərəm. Düzdü, hələ tam hazır deyiləm, amma tez bir zamanda əvvəlki formamı bərpa edəcəyəm”.
Abasov arxada qalan iki turu dəyərləndirməklə yanaşı gələcək üçün də nikbin danışıb: “Mövsüm öncəsi bir çox problemlərlə üzləşdik. Komanda tam heyətlə hazırlaşa bilmədi. Hətta Gürcüstandakı təlim-məşq toplanışına da tam heyətlə getmədik. Amma buna baxmayaraq, komanda mövsümün ilk turunda “Xəzər Lənkəran”la oyunda yaxşı təsir bağışladı. Həmin görüşdə qələbə qazanmağa yaxın olsaq da, təcrübəsizliyin qurbanı olduq. Heyətdə yer alan futbolçuların böyük əksəriyyəti cavanlardı. Onlara bir qədər vaxt lazımdı. “Qarabağ”la görüşdə isə çox pis oynadıq nəticədə məğlub olduq. Düşünürəm ki, zədəli futbolçular sıraya döndükdən sonra və cavanlar bir-iki tur bir yerdə oynadıqdan sonra vəziyyət yaxşılaşacaq”.