12 Dekabr 2019
Köşə yazıları

“Rəvan”dalizm..

Neçə vaxtdı fikirləşirəm ki,
“neujeli”, bu boyda Azərbaycanda bir peşəkar futbol klubu yoxdur? Uzun çək-çevir,
mətbuatda araşdırmadan sonra axır ki tapdım. Çox əziyyət çəkdim, amma tapdım.
Bu, “Rəvan”dı.

“Uçan Aslanların” peşəkar olmasının əsas səbəbi
rəhbərliyinin peşəkar olmasıdı. Məni belə düşünməyə vadar edən səbəbləri
sadalayım:

Bu klubda baş məşqçi qovulursa onun yerinə sadəcə
iki namizəd arasından seçim edilir. Digər klublarımız da bunu bildiyi üçün heç
bu məşqçilərə təklif də göndərmirlər. Yəqin xəyanət eləmək istəmirlər. İndi baş
məşqçi Vladislav Qədirovdu. O, istefaya göndəriləcəyi halda yerinə gələcək; ya
Bəhmən Həsənovdu, ya da Ramil Əliyev. Klubun konsepsiyasında bu 3 məşqçidən
başqası işləyə bilməz deyə bir bənd var ya yoxdu, bilmirəm, ola bilsin
yazılmamış qanunlarından biridir bu.

Bu klubun fanklubu da yoxdur. Rəhbərliyin bu addımını da alqışlayıram.
Pulla azarkeş tutub, onlara sponsorluq edib, xərclərini ödəyib, sonra da lazım
gələndə “peşka” kimi istifadə eləmək kimi qeyi-peşəkarlıq etmək nəyə lazım?
Uğursuzluq zamanı pulumuz kəsilər deyə, “Rəhbərlik istefa!” səsləndirmək
qorxusu da yoxdu . Əslində səsləndirən də yoxdu, səbəb – azarkeş yoxdu.

Pul
verib muzdlu jurnalist də tutmurlar. Kimsə “Rəvan” əleyhinə yazı yazanda onlara
cavab versin deyə. Klub – daxili məsələdə ilk onun xəbəri olan, futbolçulardan
və məşqçidən yalnız onun müsahibə götürülməsinə icazə verilən bir jurnalisti
yoxdur. Mənə baxmayın, mən də bundan sonra rəhbərlikdən təklif gözləyirəm.

Heç rəhbərlik
özü də azarkeşlərə və ya mətbuata pafoslu açıqlama vermir. Hədlərini və nəyə
qadir olduqlarını bilirlər. Ona görə beyində analiz edəndən sonra danışırlar. Hər
uğursuzluq zamanı futbolçular baş məşqçiyə “torba tikir” deyib, 4-5 futbolçu
göndərib onun yerinə gələn futbolçuların transferlərindən də pul
“qatlamırlar”…

Saytlara və qəzetlərə elə çox reklam vermirlər.
Yaxşı edirlər. Yoxsa nəyə lazım, reklam verdiyi yer onların əleyhinə bir yazı
yazanda “reklamınızı kəsərəm haa” sözləri ilə təhdid etmək?

Mən
“Rəvan”ın təxmini yaranma səbəbini eşitmişəm. Eşitdiyimə görə hazırki rəhbərlik
“Qalatasaray” azarkeşidi və məhz ona görə də belə bir klub yaradıb. Rənglərinə
və loqolarına diqqət edin.

Məhz
buna görə mən “Rəvan” rəhbərliyinə təşəkkür edirəm. Sükanı belə saxlayın deyirəm.
Ümidvaram ki, bu peşəkarlıqları sona qədər davam edəcək.

Oxşar xəbərlər

AlQuşlar! – KÖŞƏ

Rəşad Museyibzadə

İynə və sap

Rəsul Şükürsoy

Antalyadan gələn səs

Səxavət Qurbanov