“Kəpəz”in baş məşqçisi Şahin Diniyev Azərbaycan kubokunun 1/8 finalında birinci divizion təmsilçisi “Şahdağ”a 5:1 hesabı ilə qalib gəldikləri oyunla bağlı fikirlərini açıqlayıb.
İdmanxeber.com-un məlumatına görə, matçdan sonra o, bunları deyib:
“İlk yarıda rəqibə təzyiq etdik ki, bizə lazım olan hesabı təmin edək və sonra rahat oynayaq. Bu matçda Premyer Liqada oynamayan, əvəzedici heyətdən çağırdığımız futbolçuların çıxış etməsini istəyirdim. Gəncə futbolunun inkişafı üçün o gənclər indidən yavaş-yavaş öyrənməlidirlər. Çempionatda onları oynatmaq çətin olur, amma zaman-zaman belə imkan yaradırıq”.
Ş.Diniyev komandasının qələbəyə layiq olduğunu söyləyib: “Oyunun asan keçməsində oyunçularımızın rolu var. Hər bir görüşə ciddi yanaşmaq lazımdır, bu gün biz də elə etdik. Kubok Avropaya çıxış üçün qısa yoldur. Uğurlu çıxışımızı davam etdirməyə çalışacağıq”.