“Bu hesabla uduzacağımızı gözləmirdim. Ən çox ehtiyat etdiyim erkən qol buraxmağımız idi. Bu da baş verdi. Ən zəif oyunumuzu oynadıq. Portuqaliyanın bütün komponentlərdə bizdən üstün olduğunu gördük”.
İdmanxeber.com-un məlumatına görə, bu sözlər i U-17 millimizin baş məşqçisi Təbriz Həsənov deyib.
Azərbaycan yığması Avropa çempionatındakı ilk oyununda Portuqaliyaya 0:5 hesabı ilə uduzub.
Həsənov böyükhesablı yenilgiyə görə məsuliyyəti öz üzərinə götürüb: “Növbəti oyunlara komandanı psixoloji cəhətdən hazırlamaq çətin olacaq. Məsuliyyət mənim boynumdadır. Mənim haqqımda nə istəsəz, yaza bilərsiz, amma futbolçularımın üstünə getməyin. Qarşıda hələ 2 oyunumuz var. Inanıram ki, həmin oyunlarda qalib gəlməklə qrupdan çıxacağıq”.
Millimizin çalışdırıcısı qeyd edib ki, o da komandasının 0:5 hesablı uduzmasını istəməzdi: “Mən də azərbaycanləyam, istəməzdim ki, belə uduzaq. Amma qarşıda daha 2 oyunumuz var. Şansımız tükənməyib”.
Yığmamızın çalışdırıcısı komandanın hazırlığının istənilən səviyyədə olmaması haqda sualı belə cavabıandırıb: “Hazırda hazırlıqdan danışmaq üçün tezdir. 2 oyunu da keçirək, sonra bu haqda danışarıq. Amma unutmayın ki, futbolçular əsas hazırlığı mənim yanımda keçmirlər”.
Millimizin çalışdırıcısı yığmaya ən güclüləri dəvət etdiyini qeyd edib: “Bu gün heyətə dəvət etdiyim futbolçularımın hamısı klublarında əvəzedici heyətdə çıxış edirlər. 17 yaşlıların çempionatında çıxış edən futbolçu burda 5 dəqiqə də oynaya bilməz. 17 yaşlıların çempionatını məndən çox gəzən yoxdur. Lakin orada yığmanı gücləndirəcək futbolçu yoxdur. Bu gün ən güclülər milliyə dəvət alıb”.