Futzal üzrə Avropa çempionatının D qrupunda keçirilmiş Azərbaycan – Bosniya və Herseqovina oyunundan (4:2) sonra Azərbaycan millisinin baş məşqçisi Joze Alesio Da Silva mətbuat konfransında açıqlama verib.
Braziliyalı mütəxəssis komandasının yaxşı oynadığını deyib:
“Bu gün yaxşı oynadıq. Uşaqları təbrik edirəm. Amma turnir ərzində bəxtsizlik bizdən əl çəkmədi, sona qədər bizi izlədi. İlk oyundan əvvəl iki futzalçımızın COVİD-19 testi pozitiv çıxdı. Onlar sağaldı gəldi, bu dəfə digər iki oyunçumuzun xidmətindən istifadə edə bilmədik. Zədəli oyunçularımız oldu. Bir sözlə, problemlərdən qaça bilmədik. Əlbəttə, növbəti mərhələyə yüksələ bilmədiyimizə görə təəssüflənirəm. Amma uşaqlar yaxşı çıxış etdilər, istəkli, intizamlı, mübariz idilər, sona qədər qələbə qazanmaq üçün əllərindən gələni etdilər.
Azarkeşlərin oyunu izləməsi çox vacibdir. Buna görə sevinirik ki, artıq onlar tribunadakı yerlərini aldılar və bizi dəstəklədilər. Futzalçılarımız da onlar üçün oynadılar. Əlbəttə, istərdik ki, arena tam dolsun, lakin onlardan asılı olmayan səbəblər buna imkan vermədi”.