Azərbaycan Premyer Liqasında yaranan fasilədən istifadə edən “Bakı” futbol klubu təlim-məşq toplanışı keçirir.
Idmanxeber.com-un klubun saytına istinadən yaydığı xəbərə görə, paytaxtın otellərində birində məskunlaşan komandanın toplanışə iki mərhələdən ibarətdir. Birinci mərhələ 7-12 oktyabr tarixinı əhatə edəcək. Bu müddət ərzində komanda gündə iki dəfə məşq edəcək. Bu gün isə saat 16:00-da İsmət Qayıbov adına Bakıxanov qəsəbə stadionunda İbrahim Uzuncanın futbolçuları “Neftçi” ilə yoldaşlıq görüşündə qüvvəsini sınayacaq.
Oyundan sonra bir günlük istirahətin ardından təlim-məşq toplanışının ikinci mərhələsi start götürəcək. 13-18 oktyabr tarixlərini əhatə edəcək bu mərhələdə daha bir yoldaşlıq görüşünün keçirilməsi planlaşdırılır. Təlimlərin ardından komanda Premyer Liqanın VIII turunun oyununu keçirmək üçün Lənkərana səfər edəcək.
Təlim-məşq prossesinin gedişi barədə “Bakı”nın baş məşqçi İbrahim Uzunca klubun saytına fikirlərini bildirib:
“Bilirsiniz ki, Azərbaycan Premyer Liqasında fasilədir. Bu hamıdan çox bizim xeyrimizə oldu. Çünki komandam çempionata təlim-məşq toplanışı keçirmədən qatılmışdı. Ona görə də bu vaxtdan maksimum səmərəli istifadə etməyə çalışırıq. Təlim-məşq toplanışının ilk mərhələsini köməkçilərimlə birgə əsasən sürətli və texniki çalışmalar, həmçinin fərdi çatışmazlıqların aradan qaldırılması üçün hərəkətlər üzərində qurmuşuq. İkinci mərhələdə məşqlərdə intensivliyi səngidib əsasən taktiki çalışmalar üzərində işləyəcəyik”.