“Qəbələ İK” qəzetinin əməkdaşı, tanınmış jurnalist Mehman Süleymanovun müsahibəsi
– Düzü, qarşıma mütləq olaraq belə plan qoymamışdım. Sadəcə, rusların bir sözü var – “spontan”, yəni gedişatdan asılı olaraq bu ideya təşəkkül tapdı. Tarixçə keçən il ötən il oktyabrından – uzun illər çalışdığım “Futbol+” və adıçəkilən qəzetin baş redaktoru Mahir Rüstəmliyə ünvanlanan təbriklərlə başladı (uyğun olaraq, 21 və 22 oktyabr). İlk redaktorum Vüsal Mahmudovun rəhbəri olduğu Futbolinfo.az saytının 1 yaşı tamam olanda da təbrik yazmışdım. O vaxtdan başlatdığım iş yazı formasını aldı və tədricən həvəs oyandı. Ötən ilin noyabrında İlkin Xəlilovun da ad gününü təbrik etdim və bu, ürəyimcə olan yazılardan biri kimi alındı. Beləcə bu təbriklərlə marafona başladım. Ancaq sistematik olaraq bu ildən layihəyə start verdim.
– Hər halda yazıları xeyli adamın “layk” etməsi və şərhlər yazması da diqqətin böyük olduğunu göstərdi…
– Açığı, mən belə reaksiya olacağını gözləmirdim. Tədricən bu işi layihə halına saldım. Hətta məni görəndə çoxları ad gününün vaxtını xatırladır və mənlə şəkil çəkdirənlərin sayı artırdı. Belədə marağın böyük olduğunu qəbul etdim. Hətta bir çoxları mənim yazılarımı oçerk kimi saytlarında yerləşdirdi. Bu, elə əslində insanın fəaliyyəti haqda təbrik oçerki sayıla bilər. Çalışıram hər dəfə fərqli fikirlərdən istifadə edim. Deyək ki, hər hansı futbolçu klublarımızın birinə transfer olunur. Biz jurnalistlər dərhal onun karyerası haqda təqdimat yazırıq. Mənim layihəm də idman jurnalistlərini bu formada tanıdır. Onların arasında klub əməkdaşları da olub. Bu layihəmin əsas məqsədlərindən biri idman jurnalistlərini tanıtmaqdır.
– Yazını “feysbuk”da paylaşanda bir xeyli adamı “taq” edirsiniz. Niyə?
– İstəyirəm bu yazıda çoxlarının adı hallansın. Onu da əsaslandırıram. Həmin adamlar başqalarına yaxın olduqlarını hiss edirlər.
– Niyə hansısa saytda yox, “feysbuk”da yazırsınız? Hər halda, jurnalistlər yazını feysbukdan götürüb sayta qoyur. Saytda daha geniş çərçivədə işıqlandıra bilərdiniz…
– Mən 2013-cü ilin sentyabrından “Qəbələ İK” qəzetində çalışıram. Buna qədər 6 il 9 ay apasport.az-da işləmişəm, onun yaradıcılarından biri olmuşam. Klub qəzetinə gələndən profilim dəyişib. Mən feysbukda istəyimi, “baqaj”ımı daha rahat paylaşıram və ordan götürüb saytlara yerləşdirirlər. Bir çoxları, xüsusən də sportinfo.az saytı bu təbrikləri mütəmadi işıqlandırıb. Futbolxeber.az, Qol.az, Fanat.az və digər saytlar vaxtaşırı istifadə edib.
– Növbəti il də yenə ad günü təbriklərini təkrar etmək istəyirsiniz?
– Hər halda, eyni məlumatları yenidən yazmaq uyğun olmazdı. Lakin yadımdan çıxan jurnalistlərlə bərabər, bir çox futbol adamlarını da tanıtmaq istəyirəm. Hansılar ki, onlar haqda heç yazmamışam. Ancaq növbəti il üçün ad günü ilə bağlı başqa layihəm var. Sürpriz olsun deyə, açıqlama vermək istəmirəm.
– Reallaşdırdığınız ad günü layihəsi ilə nəyə nail oldunuz?
– Məqsəd qoydum ki, bu layihə davamlı olsun və onun necə rezonans doğuracağı mənə maraqlı idi. Məncə, uğurlu oldu. İnsanların diqqətini çəkdisə, demək maraqlıdır. Hər halda, 1-2 nəfər desəydi, başqa məsələ. Bu qədər adamın xoş sözləri səmimiyyətdən xəbər verir.
– İndiyədək nə qədər insan haqda təbrik yazısı yazmısınız?
– 250-yə yaxın olar. Təbriklərim əsasən “feysbuk”dakı dostlarımla bağlıdır. Bunların sayı isə 500-dən bir az çoxdur. Hardasa yarısına təbrik yazmışam. Bunlar arasında həmkarlarım çox olsa da, futbolçular, məşqçilər, futbol adamları, mətbuat xidməti rəhbərləri, futbola, idmana bağlı olmayan dost-tanışlar da var.
– Maraqlıdır, bəs bu qədər təbrik yazan Mehman Süleymanov kimdən təbrik eşitmək istəyir?
– Mənim ad günüm martın 18-də olub. Həmin vaxt mənə 100-ə yaxın təbrik gəldi. Hər birinə ayrılıqda təşəkkürümü bildirdim. Vüqar Xiləli statistik xarakterli maraqlı, qeyri-adi yazı yazmışdı. Rahib Səmədov, Tengiz Məmmədov, Tahir Hümbətov və bir çoxları da təbriki yazı formasında ünvanlamışdı. Öz ad günümdə yazılan təbriklər mənə tramplin oldu. Növbəti ad günümdə müraciət ünvanlayacağam görüm, kim məni necə təbrik edəcək?! Bu 3 cümlə də ola bilər, 15 cümlə də. Mən öz təbriklərimlə bir rəssam kimi insanın portretini, cizgilərini yaradıram. İndi görüm, məni necə təsvir edəcəklər?! (gülür).
Mənbə: sportnet.az