Bu axşam Avropa Liqasının qrup mərhələsində V turun oyunları keçiriləcək. Azərbaycan təmsilçiləri – “Qarabağ”la “Qəbələ” də növbəti oyularına çıxacaq. “Qəbələ” safərdə Yunanıstanın PAOK klubunun qonağı olacaq, “Qarabağ” isə doğma meydanda İngiltərənin adlı-sanlı klublarından olan “Tottenhem”i qəbul edəcək.
Türkiyə millisinin baş məşqçisi Fatih Terim komandalarımızın şanslarını ölkə.az-a müsahibəsində dəyərləndirib. Həmin müsahibəni təqdim edirik.
– Sizi Azərbaycandan narahat edirik. Sizə bir neçə sualımız olacaq xahiş edirik suallara cavab verərdiniz.
– Salam, xoş gördük. Buyurun, istənilən suallarınızı verə bilərsiniz.
– Bildiyiniz kimi bu axşam Avropa Liqasında V turun oyunları keçiriləcək. Azərbaycanın iki klubu – “Qarabağ” və “Qəbələ” növbəti oyunlarına çıxacaqlar. Bu barədə nə deyə bilərsiniz?
– Hər iki klubunuzun oyunlarını izləmişəm. “Qarabağ” artıq ikinci dəfədi ki, qrup mərhələsində iştirak edir. Və artıq özünü tanıtdıra bilib. “Qəbələ” bu il qrup mərhələsində çıxış etsə də, rəqiblərinə çətinlik yaradıb. Səhv etmirəmsə, bu “Qəbələ”nin Yunanıstana ikinci səfəri olacaq.
– Hansı klubun daha şanslı olduğunu hesab edirsiniz?
– Hesab edirəm ki, belə oyunlarda favorit komanda olmur. “Qarabağ” Londonda keçirilən ilk oyunda bunu sübut edib. Nəzərə alsaq ki, “Qarabağ”ın “pley-off”a yüksəlmək şansları hələ də var, “Tottenhem” üçün çox çətin olacaq. Üstəlik şənbə günü “Tottenhem” öz meydanında “Çelsi”ni qəbul edəcək. Məncə “Qarabağ” “Tottenhem”lə oyunda uduzmayacaq.
– “Qarabağ”da çıxış edən hansı futbolçuları tanıyırsınız və bəyənirsiniz?
– “Qarabağ”ın heyətində yaxşı futbolçular var. Məsələn, Rəşad Sadıqov, Reynaldo, Almeyda kimi futbolçular komandaya hər zaman kömək edə bilərlər. Rəşad Türkiyə Super Liqasında da oynayıb. Yanılmıramsa “Qarabağ”ın qrup mərhələsində vurulan bütün qolları Almeyda vurub.
– Ötən mövsüm “Qarabağ” – “İnter” oyununu idarə edən çexiyalı hakim Zelinka bu axşam “Molde” – “Fənərbaxça” matçında fit çalacaq. Ötən il “Qarabağ”ın qələbə topunu saymayaraq haqqını tapdalayan Zelinkanın bu dəfə nə ilə yadda qalacağını düşünürsünüz?
– Xəbərim var. Hakimin bu qərarı böyük səs-küyə səbəb olmuşdu. İnşallah bizim matçda belə səhvə yol verməz. (gülür)