Misli Premyer Liqasının 23-cü turunda “Qarabağ” səfərdə “Zirə”nin qonağı olub və qələbə qazanıb.
İdmanxeber.az-ın məlumatına görə, oyundan sonra Ağdam klubunun çalişdırıcısı jurnalistlərin suallarını cavablandirib:
– Futbolçularımı təbrik edirəm. Çox gərgin oyun oldu. Bərabərəlik də pis nəticə olmazdı. Oyun ona gedirdi. Qol imkanlarımız çox olmadı. Rəqib çox yaxşı hazırlaşmışdı bizə qarşı. Bütün oyunçuları diqqətli və düzgün analiz etmişdilər. İmkan vermədilər o qədər də baxımlı oynayaq. Mübarizədən xoşum gəldi. Futbolçularım sona qədər mübarizə apardılar. Durmadılar. Çox vacib üç xal qazandıq. Rəşada uğurlar arzu edirəm.
– Bir vaxtlar “Qarabağ”da işləmiş Ruben Selles hazırda “Sauthempton”da baş məşqçidir. O, sizdən çox şey öyrəndiyini deyib. Dünən “Çelsi”ni də uddular…
– Çox da dərinə getmək istəmirəm. Ona təşəkkür edirəm ki, burada ümumi işimizi dəyərləndirib. Mən tək deyildim, burada birlikdə idik. Müzakirələrimiz olurdu. Futbolçuların fiziki durumunu yaxşı səviyyəyə gətirib çıxarmağı düşünürdük. Mənim üçün xoşdu. Özümə görə yox, “Qarabağ” və Azərbaycanın adının çəkilməsinə görə şadam. Hazırda İngiltərədə baş məşqçi funksiyasını yerinə yetirir. Ona uğurlar arzulayıram. Özüm haqda heç düşünmürəm. Azərbaycan və “Qarabağ” haqda suallar səslənməsinə sevindim.
– “Gent”lə səfərdəki oyunda Musanı əsas heyətdə görməyəcəyik? Çünki bu gün tək o istirahət etməyib.
– Qəti qərar verməmişəm hansı heyətlə oynayacağımıza. Musa daha az oynayanlardan idi. Bu gün sona kimi oynatmadım. Matçın gedişatına görə belə addım atdıq. Ramil çox yorulmuşdu. Hücumçu kimi Musanı oynatmağa məcbur idik. Qarşıda bir neçə günümüz var. Qərar verəcəyik.
– Birinci hissədə rəqib sizi çox sıxdı. İlk hissədə tam istədiyiniz oyunu oynaya bilməməyinizin səbəbi nə idi?
– Bəlkə oyunboyu bunu edə bilmədik. Rəqib imkan vermədi ki, rahat öz oyunumuzu oynayaq. Mübarizənin hesabına qələbə qazandıq.
– Yeni transferlər start heyətdə meydana çıxmışdı. Onlardan razı qaldız?
– Bəli. Amma öz optimal formalarından uzaqdırlar. Qarşıdakı matçlarda oynayacaqlar. Vaxt lazımdır.
– “Qarabağ” uzun müddətdir ki, yerli bazardan legioner transfer etmir. Bu, nə ilə bağlıdır?
– Üzrlü hesab edin, cavab verə bilməyəcəm.