“Connect TV” Azərbaycan Premyer Liqasının II turunun oyunlarını retranslyasiya edəcək.
İdmanxeber.com xəbər verir ki, bununla bağlı Azərbaycanın kabel operator televiziyası ilə AFFA arasında razılıq əldə olunub.
Razılığa əsasən, AFFA tərəfindən “Connect TV”yə futbol üzrə Azərbaycan çempionatının oyunlarının, yəni Azərbaycan Premyer Liqasının II turunun kabel televiziyasının yayımladığı C1 kanalında retranslyasiya edilməsinə dair hüquq verilib. Eyni zamanda razılığa əsasən, gələcəkdə “CBC Sport” kanalında yayımlanacaq oyunlar da “Connect TV” tərəfindən retranslyasiya ediləcək.
Qeyd edək ki, Premyer Liqanın II turunun oyunları həftənin şənbə, bazar və bazar ertəsi günlərində saat 21:00-da “Connect TV”-nin C1 kanalında yayımlanacaq. “Connect TV” Bakı, Sumqayıt, Xırdalan şəhərləri və ətraf qəsəbələrdə əhaliyə keyfiyyətli efir-kabel televiziyası xidmətləri göstərir. Hazırda kabel operator televiziyası rəqəmsal və HD yayımda 6 dildə 3 növ kanallar paketində ümumilikdə 172 kanal yayımlayır. (Report)