“Belçika məğlubiyyəti gözlənilən idi. Rəqib aşkar favoritdir. Bəlkə də sürpriz etməyi bacarardıq. Ancaq alınmadı. Belçika millisi dünyanın ən güclü komandalarından biridir. Ustalıq səviyyəsi aradakı fərqi göstərdi”.
Bu sözləri İdmanxeber.az saytına milli komandamızın sabiq futbolçusu Elvin Yunuszadə yığmamızın dünənki məğlubiyyəti barədə danışarkən deyib. O, daha sonra belə davam edib:
“Belçika məğlubiyyətinin səbəbi nə məşqidir, nə futbolçular. Uduzmağımızın səbəbi sırf ustalıq səviyyəsidir. Rəqib adlı-sanlı oyunçulardan ibarətdir. Heyətlərində dünya səviyyəli futbolçular var. Fərqli məğlubiyyətin səbəbi bunlardır”.
31 yaşlı futbolçu millinin baş məşqçisi Canni De Byazinin millidə qalıb-qalmamalı sualına belə cavab verib:
“İsveçə qarşı yaxşı oyun keçirmişdik. Həmin oyunu rəqibin iddiasının olmadığına bağlayanlar var. Qələbəni aşağı çəkmək lazım deyil. Çünki bu oyunlar istənilən halda çətin keçir. İsveç üçün heç bir fərqi yoxdur, meydana qələbə üçün çıxmışdı. Axıra qədər oynadılar. Bu, təsadüfü qələbə deyildi. Futbolçularımız yaxşı mübarizə aparmışdılar. Həmin vaxt hamı Canni De Byazini tərifləyirdi. Bu gün isə hər kəs tənqid edir. Ancaq məğlub olduğumuz komanda bizlə başa-baş bir kollektiv deyildi. Belçika dünyanın güclü millilərindən biridir”.
Həsən Quluzadə