Olavio Juninyonun ayrılığının ardından “Qarabağ” hücumçu axtarışlarını davam etdirir.
İdmanxeber.az-ın məlumatına görə, mətbuatda Ağdam təmsilçisinin bir neçə futbolçu ilə maraqlandığı barədə xəbərlər dolaşır. “Köhlən atlar” Juninyonun boşluğunu doldurmaq üçün o mövqeyə oyunçu axtarışındadı.
Sosial şəbəkələrdə artıq bir neçə futbolçunun adı ön plana çıxıb. Bunlardan biri də Estoniyanın “Kalyu” klubunda çıxış edən Qilerme Smitdir. 21 yaşlı braziliyalı forvardın “Qarabağ”ın gündəmində olduğu iddia edilir.
Smit karyerası ərzində bir neçə klubun formasını geyinib. O, Portuqaliyanın “Braqa”, Brazilyanın “Botafoqo”, Ukraynanın “Zorya” klublarının gənclərdən ibarət komandasında çıxış edib.
Futbolçunun Estoniya klubu gələn ilin dekabrına qədər müqaviləsi var. O, ötən il “Kalyu” forması ilə 15 matçda 7 qol vurub.