Azərbaycan I Liqasında çıxış edən “Şamaxı” klubu hazırda turnir cədvəlində 3-cü pillədə qərarlaşıb. Ötən mövsüm Premyer Liqanı tərk edən bölgə klubunda əsas hədəf yenidən elitaya qayıtmaqdır.
Komadanın qarşıdakı kubok oyunu və çempionat görüşləri barədə baş məşqçi Vüqar Əsgərli ilə söhbət etdik
-Ölkə kubokunda “Zaqatala” ilə qarşılaşacaqsınız. Komandanın kubokdakı hədəfi nədir?
Mübarizəyə II təsnifat mərhələsindən qoşulacağıq. Kubok oyunlarında planlar nəticəyə görə qurulur. Necə olacağını zaman göstərəcək.
-Mövsümə yaxşı başlasanız da, sonradan biraz dayandınız. 8 turdan sonra komandanın mövqeyi sizi razı salır?
Oynadığımız oyunla daha çox xal qazanmalı idik. Çünki görüşlərin çoxunda açıq aşkar üstünlük bizdə olur. Amma bəzi detallarda buraxılan səhvlərə görə hal hazırda liderdən 2 xal geri qalırıq. Qarşıdakı turlarda bunun düzələcəyinə ümid edirik.
-Ötən mövsüm yerli futbolçularla çıxış etdiniz və Premyer Liqa ilə vidalaşdınız. Elitaya yüksəlsəniz, eyni prinsiplə davam edəcəksiniz?
Premyer Liqaya qayıdandan sonra bu məsələ haqqında müzakirə aparmaq olar. Hələki eyni cür davam edirik. Amma deyim ki, buradan yenidən elitaya qayıtmaq o qədər asan deyil. Bu ildən birinci liqanın səviyyəsi ötən illərə nisbətən daha da yüksəlib. Kifayət qədər yaxşı rəqiblərimiz var. Ümid edirəm sonda çempion olub məqsədimizə çatacağıq.
-“Şamaxı”da maddi durum necədi? Sponsor var?
Bu klubda heç vaxt maliyyə problemi olmayıb və heç bir sıxıntı yoxdur. Son zamanlar sponsorların futbola az da olsa marağının artmağı hiss olunur. Ümid edirəm tezliklə bütün klublarımıza yeni sponsorlar diqqət ayırar və futbol adına gözəl işlər görülər.
Millimizin iki oyunu barədə nə düşünürsünüz? Qrupda qazanılan 7 xaldna sonra baş məşqçi ilə vidalaşılır…
Son iki oyun barədə danışası olsaq təbii ki, İsveç üzərində möhtəşəm qələbə hamımızı sevindirdi və gələcək üçün yaxşı ümid verdi. Belçika ilə oyunda isə məncə erkən “qırmızı” millimizin planlarını pozdu və belə güclü rəqibə qarşı işimizi çətinə saldı. Qrupda daha çox xal qazanmaq mümkün idi. Hər bir baş məşqçi gələndə onun qarşısına hansısa bir məqsəd qoyulur və yerinə yetirib-yetirilməməsinə görə onun barədə qərar verilir. Federasiya rəhbərliyi artıq lazımi qərarı verib. Ölkə futbolu üçün xeyirli olsun.
Həsən Quluzadə