“Sumqayıt”ın kapitanı Elvin Bədəlov İdmanxeber.az saytına müsahibə verib. O, dünənki “Turan Tovuz” məğlubiyyətindən və komandanın bu mövsümkü hədəflərindən danışıb.
– Məğlubiyyətin səbəbləri nə idi? Oyunu necə şərh edirsən?
Görüşün əvvəli çox çətin keçdi. Tovuzdakı ab-hava ev sahibi komandaya yaxşı təsir etdi. Motivasiyaları yüksək səviyyədə idi. Bu səbəbdən də matça onlar daha yaxşı başladılar. Biz ilk dəqiqələrdən reaksiya verə bilmədik. Daha sonra oyunun ortalarında çıxışımızı bir az düzətdik. Gözləmədiyimiz anda qol buraxdıq və əvəzini çıxa bilmədik. İkinci hissədə yaxşı oynadıq. Ancaq şanszılıq qol vura bilməməyimizə mane oldu.
– Sanki hücum xəttində komanda müəyyən problem yaşayır..
Əslində oyunumuzda yaradıcılıq var idi. Baxsaq, komanda nəsə etməyə çalışırdı. Ancaq “Turan Tovuz” çox kompakt müdafiə olunur. Onların baş məşqçisi buna üstünlük verir. Dəhşət dərəcədə yaxşı sıxlaşırdılar. Buna görə də daha kreativ olmağa çalışmaq lazım idi.
– Komanda ötən mövsüm avrokuboklara vəsiqə qazandı. Bəs bu mövsüm azarkeşlər “Sumqayıt”dan nə gözləsin?
Yeni istəyərik orda oynamaq. Çünki avrokuboklar bizim üçün yaxşı təcrübə oldu. Çalışacağıq ki, yenə vəsiqə qazanaq. Amma çox çətin olacaq. Bütün rəqiblər heyəti gücləndirir. Hər kəs yeni futbolçular gətirir. Bütün komandalar avrokuboklar üçün mübarizə aparacaq. Bunun nə dərəcə alınacağını zaman göstərəcək.
– Ümumiyyətlə, “Fehervar”ı keçə bilmədiyi üçün komanda çox tənqid olundu. Necə düşünürsən, rəqib sizdən çox üstün idi?
Səviyyəcə bəlkə üstün idilər. Ancaq oyunlarda bunu görmədik. “Sumqayıt” iki oyunda da “Fehervar”dan üstün idi. Sadəcə sonluq keyfiyyəti rəqibdə daha yaxşı oldu. Bizdə dəqiqlik çatışmadı. Bu da normaldı. Komandadan oyunçular getdi, yeniləri gəldi. Bir-birimizi başa düşmək üçün vaxt lazım idi.
– Futbolçuların gedib-gəlməsindən söz düşmüşkən, transfer məsələsi barədə nə düşünürsən? İndiki heyətlə komanda nəyi bacarar?
İnanmıram ki, heyət belə qalacaq. Məncə, yeni futbolçular gələcək. Bunun yaxın zamanda baş verəcəyinə inanıram. Yeni transferləri hamımız gözləyirik. Bütün komandalar güclənirsə, biz də güclənməliyik. Sona qədər bu komanda ilə oynayacağımıza inanmıram. Yeni oyunçular gələndən sonra hədəflər barədə daha dəqiq danışa bilərik. Yenə də məqsədimiz yuxarı pillələrdə olmaqdır.
Həsən Quluzadə