Azərbaycan millisinin baş məşqçisi Canni De Byazi Sloveniyaya qarşı keçiriləcək yoldaşlıq matçı barədə fikirlərini bildirib.
İtaliyalı mütəxəssis oyunöncəsi mətbuat konfransında sabah qələbə qazanmağa çalışacaqlarını söyləyib:
“Hamını bu böyük gün, qələbə münasibətilə təbrik edirəm. Azərbaycan xalqı bu səhər yuxudan artıq qalib xalq kimi oyanıb. Nəhayət, 30 illik münaqişəyə son qoyulur. Azərbaycan xalqına ən səmimi arzularımı çatdırıram.
Sabahkı oyunda daha çox yeni cəlb etdiyimiz oyunçulara şans verəcəyəm. Oyuna yaxşı hazırlaşmaq üçün yetərli vaxtımız olmayıb. Toplanışa dəvət olunan futbolçularla bərpa məşqləri keçmək imkanımız olub. Bütün oyunlar bizim üçün vacibdi. Sabah da qalib gəlmək üçün mübarizə aparacağıq.
Hər zaman demişəm, millinin qapısı hər bir futbolçunun üzünə açıqdı. Kim özünü yaxşı tərəfdən göstərsə, dəvət alacaq. Kim verilən şansdan istifadə edə bilməsə, özünü doğrultmasa, millinin qapısı üzünə bağlana bilər”.