Gəncədə Futbol Akademiyasının tikintisi davam edir.
“Kəpəz” rəhbərliyi və bütün Gəncə futbolsevərlərinin həsrətlə gözlədiyi akademiyada çalışmalar bütün gücü ilə davam edir. Bir müddət öncə akademiyanın tam hazır olacağı ilə bağlı mətbuatda müxtəlif tarixlər yazılırdı.
Hətta ötən ilin sonlarına qədər futbol məktəbinin hazır olacağı iddia edilmişdi. Ancaq həmin dönəm klub rəhbərliyi mətbuata açıqlamasında bu iddiaları təkzib edərək çalışmaların davam etdiyini bildirdi.
Akademiyanın istifadəyə verilmə tarixi ilə bağlı klubun mətbuat xidmətindən saytımıza bir neçə dəfə müxtəlif tarixlər deyilsə də, onlar da öz əksini tapmayıb.
İdmanxeber.az-ın etibarlı mənbədən əldə etdiyi məlumata görə, artıq çalışmaların son mərhələsinə gəlinib. Binada müəyyən kosmetik işlər aparıldıqdan sonra ətrafda qazonun salınmasına başlanacaq.
Rəhbərlik və səlahiyyətli şəxslər akademiyanın ən qısa vaxtda fəaliyyətə başlaması üçün bütün diqqətlərini bu işə ayırıb. Artıq futbol məktəbinin istifadəyə veriləcəyi tarix elə də uzaq deyil.
Qeyd etdiyimiz tamamla işlərinin ardından böyük ehtimal iyun ayında akademiyanın istifadəyə verilməsi gözlənilir.