İdman

“Gənc əlillər arasında stol üstü oyunların keçirilməsi” adlı layihəyə yekun vuruldu – VİDEO

Bakıda keçirilən “Gənc əlillər arasında stol üstü oyunların keçirilməsi” adlı layihəyə yekun vurulub. Layihə Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirilib. Layihəyə I qrup əlilliyi olan gənc fəal Cavid Həsənli rəhbərlik edib.

Ardıcıl 3 təlim günündən sonra Sabunçu rayonu, Ramana qəsəbəsində layihənin finalı – yarış günü baş tutub. Yarış kifayət qədər maraqlı keçib. Hətta maraq çox olduğundan iştirakçıların sayı da gözləniləndən – 30-dan çox olub. Yarışdan əvvəl layihənin rəhbəri Cavid Həsənli çıxış edərək layihənin məqsədindən bəhs edib və iştirakçılara uğurlar arzulayıb. Daha sonra start verilib və maraqlı, bir o qədər də həyəcanlı qarşılaşmalar bir-birini əvəzləyib.

Günün sonunda qaliblər müəyyənləşib. Bütün iştirakçılara sertifikatlar təqdim olunub. Hər kateqoriya üzrə birinci, ikinci və üçüncü yerin sahiblərinə isə alqış sədaları altında diplom verilib. Sonda bir daha Cavid Həsənli çıxış edərək qalibləri təbrik edib. Həsənli layihəsinin icrasında ona dəstək olan bütün tərəfdaşlarına təşəkkür edib və Gənclər Fonduna minnətdarlığını bildirib.

Qeyd edək ki, yarış üç – nərd, dama və şahmat kateqoriyaları üzrə keçirilib.(sportlife.az)


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43