Azərbaycan Premyer Liqasında IX turun “Qəbələ” – “Qarabağ” (0:1) oyunundan sonra təşkil edilən mətbuat konfransında meydan sahiblərinin baş məşqçisi Elmar Baxşıyev jurnalistlərin suallarını cavablandırdı.
İdmanxeber.az-ın məlumatına görə, o, əvvəlcə matç barədə fikirlərini bildirdi…
– Bilirdik ki, ağır oyun olacaq. “Qarabağ”ın gücü hamıya bəllidir. Komandam meydanda mübarizliyi ilə 90 dəqiqə oyundan qopmadı. Layiqli çıxış etdik. Xal qazanmasaq da, dinamika baxımından komandadan razı qaldıq.
– İkinci hissədə yalnız müdafiə olunduz. Son 5 dəqiqədə isə gözlədiyimiz “Qəbələ”ni gördük…
– “Qarabağ”a qarşı 10 nəfərlə oynayırsansa və hesab açılmayıbsa, heç bir komanda irəli atılmaz. Son dəqiqələrdə son gücümüzü meydanda qoyduq.
– İlkin Qırtımız lüzumsuz qırmızı vərəqə aldı. Bunun adı məsuliyyətsizlik deyilsə, nədir?
– Hər epizodu belə dəyərləndirmək olmaz. Rövlan “qırmızı” alandan sonra da hamı yazırdi ki, komandada nəsə baş verir. Bu gün də top uğrunda mübarizədə belə hal yaşandı. İnanmıram ki, İlkin bilərəkdən o hərəkəti etdi. Nizam-intizamı yerində olan futbolçudur.
– Komandanın heç-heçə etməyib. Bunu nə ilə əlaqələndirmək olar?
– “Səbail”lə matç heç-heçəyə gedirdi, son dəqiqələrdə qol vurduq. Komandanı daha çox hücumda görmək istəyirəm. Bəzən daha yaxşı alınır. Olmayanda da məğlub oluruq.
– İlk dövrəni 15 xalla 5-ci yerdə başa vurduz…
– Çıxışımızı xalla dəyərləndirməzdim. Oyundan oyuna komanda daha yaxşı çıxış edir. Getdikcə daha məzmunlu oynayacağımıza inanıram.
– Birinci hissə başa çatandan sonra hakimlərə etiraz etdiz. İdarəçilikdən razı qaldız?
– Onu da normal qarşılamaq lazımdır. Oyunun içində olan hallardır. Sərt eütiraz etmədim. Sadəcə, fikrimi bildirdim. O da öz cavabını verdi. Hər şey qarşılıqlı anlaşma çərçivəsində oldu.
– Komandanın yenidən avrokubokda oynamaq potensialı varmı?
– İndi heç kim avrokubokları fikirləşmir. Daha çox oyun elementlərini yaxşılaşdırmaq istəyirik. Qarşıda 3 dövrə var. İddiamızdan əl çəkməyəcəyik.