Ölkə futbolu

Karlos Kardozo: “Futbol karyeramı bitirmək məcburiyyətində…”

“Neftçi”nin braziliyalı futbolçusu Karlos Kardoso klubun rəsmi saytına müsahibə verib. Hazırda zədəli olan müdafiəçi bu yay transfer olunduğu yeni komandası və Topaz Premyer Liqası haqda fikirlərini açıqlayıb.

– “Neftçi”yə gəldiyiniz gündən qısa müddətdə komandaya uyğunlaşdınız və əsas heyətdə möhkəmlənməyi bacardınız. Bir legioner üçün bu nə dərəcədə çətindir?

– Azərbaycana gəldiyim gündən anladım ki, bu mühitə uyğunlaşmağım çətin olmayacaq. Təbii ki, hər ölkənin öz adətləri var amma peşəkar futbolçu üçün bu maneə olmamalıdır. Bura uyğunlaşmağımda komanda yoldaşlarımın da köməyi oldu. Təzə gələndə “Neftçi”də çıxış edən braziliyalı həmyerlilərimlə ünsiyyətdə olurdumsa indi bütün komanda yoldaşlarımla dostlaşmışam. Komandamızda mehriban ab-hava var və belə olduqda uyğunlaşmaq asanlaşır.

– Müdafiəçi olsanız da, bir sıra oyunlarda qol vurmaq bacarığınızı da nümayiş etdirmisiniz. Bəlkə də elə buna görə Kardoso tez bir zamanda azarkeşlərin sevgisini qazandı…

– Bir müdafiəçi kimi əsas vəzifəm rəqib hücumlarının qarşısını almaqdır. Amma hərdən hücumlara da qoşuluram və məncə pis də alınmır. İstəyirəm ki, komandamızın qələbə qazanması üçün əlimdən gələni edim. Kimin qol vurması o qədər önəmli deyil. Vacib olan sonda tabloda görünən nəticədir. Azarkeşlərə isə xüsusi təşəkkür düşür. Onların dəstəyini hər oyunda hiss edirik. Sevinirəm ki, qısa müddətdə onların sevgisini qazandım və bu münasibət qarşılıqlıdır.

– Superkubok uğrunda oyunda aldığınız zədə nə dərəcədə ciddidir?

– Futbol mübarizəni sevir. Belə olan halda zədə almaq da bəzən qaçılmaz olur. Həmin epizoda rəqib futbolçu ilə toqquşduqdan sonra özümdə deyildim. Bəlkə də zədəm bir qədər də ciddi olsaydı, futbol karyeramı bitirmək məcburiyyətində də qala bilərdim. Xəstəxanada tədricən özümə gəldim və başımın üzərində klub rəhbərliyini və həkimləri gördüm. Komandam ən çətin günümdə belə mənim yanımda oldu. Eyni zamanda, Naxçıvanda mənə zəruri olan tibbi yardımın göstərilməsi Azərbaycanın ölkə olaraq inkişafının göstəricisidir. Hazırda müalicəmi davam etdirirəm və tez bir zamanda məşqlərə başlayacam. İndiki vəziyyətdə “Neftçi”də hər mövqedə böyük rəqabət var və mənim də əvəzimə meydana çıxan istənilən müdafiəçi ümidləri doğruldacaq gücdədi.

– Bir müdafiəçi kimi sizə hansı komandaların hücum xəttinə qarşı oynamaq daha çətindir?

– Məncə, Azərbaycan çempionatında çıxış edən hər bir komanda təhlükəli hücumlar təşkil etmək və qol vurmaq gücündədir. Hansısa komandanı fərqləndirmək istəməzdim. Hər bir rəqibə hörmətlə və ciddi yanaşmalısan ki, istədiyin nəticəni qazana biləsən. Bir komanda qol vurmaq üçün digəri səhvə yol verməlidir. Çalışmalıyıq ki, rəqibi səhv etməyə məcbur edək. Braziliya, Rumıniya və Rusiya yüksək liqalarında oynamış bir futbolçu kimi deyə bilərəm ki, Azərbaycan Premyer Liqasının səviyyəsi normaldır. Açığı bura gəlməmişdən əvvəl komandalar arasında belə bir rəqabətin olduğu ağlıma gəlməzdi. Çempionatda mübarizə aparan 4-5 klub rahatlıqla Rusiya və Rumıniya yüksək liqasında çıxış edə bilər.

– Çempionluq yolunda əsas rəqiblər hansı komandalardır?

– Premyer Liqada iddialı klub çoxdur. Çempionluğun taleyini bir xal da həll edə bilər. Ona görə hər oyuna maksimum nəticə üçün çıxmalıyıq. “Neftçi” 3 qat ölkə çempionudur və bütün rəqiblər bizə oyunlarda ikiqat güc sərf edir. Çempionluq heç kimə asan başa gəlmir. Gördüyünüz kimi, hər matçda güzəştsiz mübarizə gedir. Bizim hədəfimiz birinci yeri tutmaqdır və bunun öhdəsindən gələ biləcək gücdəyik.


İdmanla bağlı qarşılaşdığınız hadisələrin video və ya fotosunu çəkərək bizə göndərin: 070 242 41 43