“Legiya”nın futbolçusu Mahir Emreli Avropa Liqasının qrup mərhələsinin 3-cü turunda “Napoli” ilə oyun öncəsi sport.se.pl saytına açıqlama verib.
Millimizin hücumçusu rəqib komandanın polşalı yarımmüdafiəçisi Pyotr Zelinskinin əla texnikaya malik olduğunu deyib: “Onu Avro-2020-də görmüşəm. Amma əvvəllər tanımırdım. Komanda yoldaşlarım onun “Napoli”də çıxış etdiyini dedi. Mükəmməl bir texnikaya malikdir, bunu bilirəm. Ümid edirəm ki, öz həmyerlilərinə qol vurmaz”.
24 yaşlı hücumçu jurnalistlərlə münasibətindən də danışıb: “Jurnalistlərin oyunçulara və məşqçilərə irad tutmağa çalışmasını xoşlamıram. Futbolçular jurnalistlərə mühazirə oxumurlar. Problemlərimiz haqqında yaxşı tonda danışa bilərik. Mənə nəyisə deyə bilərsiniz, sizi dinləyərəm. Amma təkəbbürlü olmaq istəmirəm. Çünki mənim işim meydandadır”.
Sabah keçiriləcək “Napoli” – “Legiya” matçı Bakı vaxtı ilə 23:00-da başlayacaq.