“Neftçi” – “Beşiktaş” oyunu gözlənilən kimi keçdi. Rəqib Avropada tanınmış bir klub idi. Bu gün Türkiyə UEFA reytinqində artıq 10-cu sıradadır. Elə bu onların klubları ilə bizimkilər arasındakı fərqi ortaya qoyur”.
Bu sözləri idmanxeber.az saytına azərbaycanlı məşqçi Adil Şükürov UEFA Konfrans Liqası III təsnifat mərhələsi çərçivəsində keçirilən “Neftçi” – “Beşiktaş” görüşü (1:3) barədə danışarkən deyib. O, daha sonra belə davam edib:
“Neftçi” ilk hissə “Beşiktaş” adı altında əzildi. Amma komanda hələ çox yenidir. Bu, uğrusuz çıxışın səbəblərindən biridir. Yeni məşqçi, futbolçular var. Adrian Mutu da danışdı ki, hələ komandanı tam formalaşdıra bilməyib. Bu gün “Neftçi” uzunmüddətli planlama işləri aparır. Bunun bəhrəsini hələ gələcəkdə görə bilər. Mutunun verdiyi siqnal da bu idi. Ancaq İstanbula qələbə üçün gedəcəklərini açıqladı. Futbolda olmayacaq nəticə yoxdur. Avropa futbolunda çoxlu sensasiyalar qeydə alınır. Hamımız “Neftçi”nin yaxşı nəticə qazanmasını istəyərik. Səfərdən heç-heçə ilə geri dönsək belə uğurlu saymaq olar”.
Şükürov avrokuboklarda debüt edən “Sabah”ın da çıxışından danışıb:
“Komanda hamımızı təəccübləndirir. Heç kim “Sabah”ın “Partizan”a qarşı belə oynayacağını gözləməzdi. Görüşün əvvəlində – 30-cu dəqiqəyə qədər təmsilçimizin rəqibi tanıya bilmədiyi görünürdü. Daha sonra isə “Sabah” “Partizan”ı “çözdü”. Elə bu andan görüşün sonuna qədər dominant oyun sərgilədi. Nəticə də istədiyimiz kimi oldu. Qaçırılmış penalti və vurulan iki qol var. Bu, “Sabah”ın gücünü göstərir və səfər oyunu öncəsi böyük motivasiyadır. Düzdür, “Partizan” əvvəlki komanda deyil. Ancaq evdə daha fərqli çıxış edə bilər. Çünki onların möhtəşəm və çılğın azarkeşləri var. Beləsi oyunlarda böyük güc olurlar.
“Sabah”ın Murad Musayevin başçılığı ilə yaxşı işlər gördüyü göz önündədir. Komadanın ilk avrokubok ilində belə nəticələr qazanması ölkə futbolu üçün qürurvericidir. “Sabah” gün keçdikcə daha yaxşı çıxış edəcək. Komanda “Qarabağ”dan fərqli olaraq, çempionatda da, avrokuboklarda da eyni oyunu göstərməyə çalışır. Baş məşqçi heyətdə dəyişikliklərə çox getmir, stabil çıxış etməyə üstünlük verir. Bu da komandanın daha yaxşı olmasına imkan yaradır”.
Həsən Quluzadə