“Xəzər Lənkəran”ın yeni baş məşqçisi Oğuz Çətinin mövsüm bitdikdən sonra rəhbərliyə təqdim etdiyi siyahıda hansı futbolçuların olduğu haqda informasiya əldə etmişik.
İdmanxeber.com-un əldə etdiyi məlumata görə, Zohair Benouahi, Rasim Ramaldanov, Elnur Abdullayev, Sakkoni, Alvaro Silva və Junior Nildonu Çətinin “qara siyahı”sında olan futbolçulardı. Düzdü Alvaro Silva, Sakkoni kimi futbolçularla yollar ayrılıb və Nildo, Benuahi kimi oyunçuların getmə şansı böyükdü. Lakin Ramaldanov və Elnur Abdullayevin siyahıda qərarlaşması sizi çaşdırmasın. Yerli futbolçu axtarışına çıxan Cənub klubunda istəniləni verə bilməyən bu iki futbolçu Çətinin heyətində görmək istəmədiyi adlardı. Bundan əlavə Slavik Alxasovun da adı Çətinin “qara siyahı”sındadı.
Türkiyəli mütəxəssisin mövsüm bitdikdən sonra rəhbərliyə təqdim etdiyi siyahıda komandaya cəlb etmək istədiyi futbolçuların da kimliyi məlumdu. Öncədən də açıqlanan Vaqif Cavadov, Rauf Əliyev, Rəşad Sadiqov kimi futbolçularla yanaşı, Abdulla Abatsiyev də XL-in almaq istədiyi futbolçulardan imiş. Lakin “İnter” Abatsiyevi XL-ə verməyib və gənc oyunçu ilə müqavilə imzalayıb.
İcarədə olan Uğur Pamuk isə “Sumqayıt”dan geri qaytarılacağı haqda öncədən də sizə xəbər vermişdik. Sən demə “Sumqayıt” Pamuku buraxmaq niyyətində deyil. Hətta “gənclik şəhəri”nin təmsilçisinin rəhbərliyi qarşı tərəflə dialoqa keçsə də, bu səmərəsiz olub.