Yayda yenidən “Qarabağ”a qayıdan Şahruddin Məhəmmədəliyevin Ağdam klubunda qalıb-qalmayacağı sual altındadı.
İdmanxeber.az-ın əldə etdiyi məlumata görə, “köhlən atlar” hələ də təcrübəli qapıçıya yeni müqavilə təklif etməyib.
Yayda Türkiyənin “Adana Demirspor” klubundan ayrılaraq yenidən “Qarabağ”a dönən qolkiper yeni sözləşmə təklif olunacağı təqdirdə komandada qalmağı düşünür. Ancaq “Qarabağ”ın məşqçilər korpusu qapıçı ilə bağlı son sözü rəhbərliyə deməyib.
Millimizin də şərəfini qoruyan qapıçının klubla mövcud müqaviləsi yayda başa çatır.
Qeyd edək ki, Məhəmmədəliyev 2016-23-cü illərdə “Qarabağ”ın formasını geyinib. O, 2023-cü ilin yayında “Qarabağ”dan Türkiyə klubuna transfer olunmuşdu.