“Maraqlı oyun alındı. Hər iki komanda öz oyun üslubunu göstərməyə çalışırdı. Komandamı təbrik edirəm. Amma yenə də inkişaf edə bilərik. Komandanın yaxşı potensialı var. Özünəinam artdıqca daha yaxşı oynayacağıq”.
İdmanxeber.az-ın məlumatına görə, bu sözləri “Araz Naxçıvan”ın baş məşqçisi Elmar Baxşıyev “Turan Tovuz” qalibiyyəti (2:1) sonrası deyib. O, daha sonra jurnalistlərin suallarını cavablayıb:
– Tovuzda oynamaq həmişə çətin olur. Komandanı oyuna necə kökləmişdiz?
– Burada oynamaq hər futbolçuya zövq verir. Oyunçularım təzyiqi hiss etmədilər, onlar təcrübəlidir. Meydanda yaxşı iş gördülər.
– “Turan Tovuz”a ilk məğlubiyyəti siz yaşatdınız. Bununla bağlı nə deyə bilərsiniz?
– O düşüncəylə yanaşmırdıq ki, gedib ilkə imza ataq. Hər komandaya qarşı hazırlıq görmək lazımdır. Bu gün yaxşı oyun nümayiş etdirdik. Kurban Berdıyev dəyərli məşqçidir. Mübarizə bizim aramızda getmir, “Turan Tovuz”la “Araz-Naxçıvan”ın arasında gedirdi. Heç bir prinsipiallıq yox idi.
– “Araz-Naxçıvan” kimin üçün oynayır?
– Mən futbolçulara və rəhbərliyə görə işləyirəm. Biz də yerli tribunanın qarşısında oynamaq istəyirik. Ümid edirəm ki, rəhbərlik bizi Naxçıvana qaytarar.
– Sizcə, Ramon Maçadonun Roderik Millerə qarşı kobud oynadığı epizodda qırmızı vərəqə var idi?
– Epizodu görməmişəm. Nəsə desəm, fərqli anlaşılacaq. Baxdıqdan sonra deyə bilərəm.