Mövsümə gözlənilməz başlanğıc edən “Qəbələ” komandası 4 oyundan sonra xal qazana bilməyib. Əyalət təmsilçisi “Sabah” və “Neftçi”yə məğlub olmaqla yanaşı, debütant “Araz Naxçıvan” və “Sumqayıt”la görüşlərdə də meydanı xalsız tərk etdi.
“Qırmızı-qaralar” mövsümə avrokuboklarda “Omoniya” oyunu ilə yaxşı start versə də, sonradan gözlənilməz eniş başladı və hələ də davam edir. Qarşıdakı turda isə “Qəbələ” mövsümə möhtəşəm başlanğıc edən “Zirə”ni qonaq edəcək. Bu oyun və ümumən komandadakı problemlərlə bağlı əyalət təmsilçisinin aparıcı üzvlərindən olan Əyyub Allaşla söhbət etdik:
– “Qəbələ” mövsümə evdəki “Omoniya” oyuna ilə yaxşı başladı. Bəs, bundan sonra nə baş verdi?
Bəli, həmin oyunda çox yaxşı çıxış etdik, başlanğıc üçün əla idi. Amma daha sonra durum dəyişdi. Nə baş verdiyini bilmirəm. Amma məncə, problem psixolojidir. Bu durumdan çıxmaq üçün komanda şəklində çalışmalıyıq.
– 4 oyundan sonra komandanın xalı yoxdur. Belə başlanğıc yəqin ki, gözləmirdiniz…
Təbii ki, gözlənilməzdir. Belə olacağı ağlıma belə gəlməzdi. Ancaq hələ mövsüm yeni başlayıb. Sakit, soyyuqqanlı olmaq lazımdır. Bilirəm, belə durumlarda səbir göstərmək çətindir. Vəziyyətdən çıxacağımıza inanıram. Bunun üçün isə bir olmalı, komanda şəklində daha yaxşı mübarizə aparmalıyıq. Bir qələbə hər şeyi düzəldəcək.
– “Sabah” və “Neftçi” məğlubiyyətləri hardasa başadüşüləndir. Ancaq debütant “Araz Naxçıvan”la oyunda da xal qazana bilmədiniz..
Həmin oyunda da gördük ki, hamı hər kəsi məğlub edə bilər. Futbolda artıq belə bir şey yoxdur. “Araz Naxçıvan” I Liqadan gəlib deyə, hamıya uduzmalıdır? Məsələn, “Qarabağ” sonuncu turda xal itirdi. “Araz Naxçıvan” görüşü bizə dərs olmalıdır. Futbolda artıq kimin-kimi udacağı bilinmir. Hər şey çətinləşib. Öncədən hansı komandanın qalib gələcəyi bilinmir.
– Adətən belə vəziyyətlərdə yükü çiyinlərinə götürüb, komandanı çətin durumdan çıxaran oyunçu olmalıdır. Sanki “Qəbələ”də belə lider yoxdur…
