“Çukariçki”nin hücumçusu Nenad Mirosavlyeviç Serbiya mətbuatına açıqlama verib.
İdmanxeber.com-un məlumatına görə, Avropa Liqasının II təsnifat mərhələsinin cavab görüşü çərçivəsində “Qəbələ” ilə qarşılaşacaq “Çukariçki”nin futbolçusu komandasının fiziki cəhətdən daha hazırlıqlı olduğunu bildirib:
“Qəbələ” ilə cavab görüşü bizim üçün asan olacaq. Rəqib ilk oyunda məğlub olduğu üçün cavab görüşündə irəli atılmağa məcburdur. Bu isə “Qəbələ”nin müdafiəsində boşluqlar yaradacaq.
Avropa Liqasında keçirdiyimiz üç oyunda üstün futbol nümayiş etdirdik. Fiziki cəhətdən daha hazırlıqlıyıq. Çünki Azərbaycan Premyer Liqasında yeni mövsüm avqust ayında başlayacaq. Biz isə artıq bu gün “Voyvodina” ilə qarşılaşacağıq. Növbəti mərhələdəki rəqibimizə gəlincə “Borussiya” və “Vest Hem”lə müqayisədə “Apollon” – “Trakai” cütünün qalibi ilə qarşılaşmağımız yaxşı oldu. Ancaq ilk öncə “Qəbələ”ni keçməliyik”.
Qeyd edək ki, Serbiyada “Qəbələ”yə 1:0 hesabı ilə qalib gələn “Çukariçki” iyulun 23-də Bakıda cavab matçına çıxacaq.