“Qəbələ”nin vitse-prezidenti Fariz Nəcəfov Azərbaycan kubokunun yarımfinal mərhələsinin cavab oyununda “Neftçi”yə qalib gələrək (3:1) finala yüksəldikləri matçdan sonra jurnalistlərə müsahibəsində deyib.
– “Qəbələ” ilk oyundakından tam fərqli çıxış etdi.
– İlk oyunda komandamızda gərginlik var idi. Bu gün isə futbolçular daha rahat idi.
– İlk qoldan sonra mərhələ adlayacağınıza inam var idi?
– Mən heç vaxt proqnoz verməyi xoşlamıram. Amma içimdə bir inam var idi. Düşünürdüm ki, “Qəbələ”nin elə-belə təslim olmağı mümkün deyil.
– “Qəbələ” adətən bu cür oyunlarda qalib gəlir, çempionat matçlarında isə uğursuz çıxış edir.
– “Qəbələ”də nə baş verirsə, hamısını analiz edirik. Bircə onu deyə bilərəm ki, ciddi bir problem yoxdur. Səhvlərimizi görürük. Çempionluq əldən getdi, çalışırıq ki, kuboku itirməyək.
– Mətbuatda belə xəbərlar dolaşır ki, “Qəbələ”də 3 aydır maaşlar verilmir.
– Yanlış məlumatdır. Hər yerdə olduğu kimi, bizdə də maaş gecikməsi olur. Amma 3-4 ay söhbəti yalandır.
– Kubokun finalı Qəbələdə olacaq. Bunu sizin üçün əlavə üstünlük hesab etmək olar?
– Finalın Qəbələdə olmasını istəmirdim. Çünki finala çıxacağımıza əmin idik. Xahiş edəcəm ki, mümkündürsə, dəyişsinlər. Amma evdə oynamaq yaxşı olar.
– Bu qələbə çempionatdakı qalan oyunlara necə təsir edəcək?
– Tamam fərqli turnirlərdir. İnanmıram ki, bu nəticə digər oyunlara mənfi və ya müsbət təsir etsin.
– Digər finalçı “Keşlə” haqqında nə deyə bilərsiz?
– Hamının tanıdığı, yaxşı komandadır. Yeni gələn məşqçinin işi göz qabağındadır.
– Hamı “Qəbələ”nin favorit olduğunu düşünür.
– Elə düşünmürəm. Kubok çox fərqli turnirdir.
– Roman Qriqorçukun komandadakı taleyi kubokdan asılı idi?
– Yox. Biz bir turnirə görə məşqçi gətirib, ya da yola salmırıq. Elə bir fikrimiz yoxdur. Yekun qərarı təbii ki, klub prezidenti verəcək.