Mövsümün davam etdirilməməsi ilə çempion elan edilən “Qarabağ”ın baş məşqçisi Qurban Qurbanov fikirlərini bölüşüb.
O, ardıcıl 7-ci ümumilikdə 8-ci çempionluğu belə şərh edib:
“Mövsümün əvvəlində qarşımıza çempionluq hədəfi qoymuşduq. Baxmayaraq ki, Premyer Liqanın bitiminə bir neçə tur qalmış çempionat dayandırıldı, ikinci pillə ilə aramızda 8 xal fərq var idi və çempion olmaq şansımız çox idi. Buna uyğun da AFFA İcraiyyə Komitəsi çempionatın dayandırılmasına və qalibi müəyyənləşdirməyə qərar verdi. Futbolçularımı təbrik edirəm, ardıcıl 7 il çempion olmaq çox yaxşı göstəricidi. Neçə ildi bu komandadayam, klub rəhbərliyi, futbolçularla və işçilərlə tək fikrimiz düzgün iş qurmaqdı. Bunu da klubda hər kəs dərk edirdi, bu stabillikdə hamının əməyi var. Bu çempionluğu qeyd etmək hamının haqqı idi, hamını təbrik edirəm. Dəfələrlə demişəm ki, hər bir uğur əldə etdikdən sonra bizim məsuliyyətimiz daha da çoxalır. Bu çempionluğun özəl bir yeri var, ardıcıl 7-ci dəfə Azərbaycanda çempion olduq. Baxmayaraq ki, ağır dövrdü, çətinliklər coxdu. Biz də öz işimizi dövlətin müəyyən etdiyi qaydalar çərçivəsində, həm də öz peşəkarlığımızla görməyə çalışırıq. Çalışacağıq ki, qarşıdakı zamandan düzgün istifadə edək. Düzdr, sıxıntılarımız olacaq, komanda uzun müddətdi rəsmi oyunlara çıxmır. Və avqustun 17-də Çempionlar Liqasının təsnifat mərhələləri başlayır. O vaxta qədər düzgün plan qurmalıyıq. Çempionat başa çatsa da, bizim üçün ən çətin dövr başlayır. Həm transfer dönəmi başlayır, həm də rəsmi oyunlarsız Çempionlar Liqasının təsnifat mərhələsinə hazırlaşmağa daha çox vaxt sərf eləmək lazım olacaq. Bu pandemiya bütün dünyada yayılıb. Hər bir halda çalışacağıq ki, düşdüyümüz situasiyanı qəbul edib bu vəziyyətdə düzgün hazırlaşaq və mövqe tutaq.
Öz azarkeşlərimizin hər birini təbrik edirəm, onlar bəlkə də bizdən çox bu çempionluğu gözləyirdilər”.