Ötən mövsüm tarixinin ən yaxşı dönəmlərindən birini keçirən “Sumqayıt” 6 oyundur qələbəyə həsrətdir. Bu oyunların yalnız birində komanda heç-heçə edə bilibsə, 5-də isə meydanı boynubükük tərk edib.
Yaxşı mövsüm keçirib avrokuboklara vəsiqə qazanan komandada birdən-birə çöküşün başlaması təsadüfü ola bilməz. Əslində klub mövsümə böyük söz-söhbətlərlə start verdi. Transfer qalmaqalı, rəhbərliklə-baş məşqçi arasında soyuq müharibə, klub daxilindəki davamlı maliyyə problemi, maaşların gecikməsi iddiası komandanın çıxışına da təsirsiz ötüşməyib.
Amma “Sumqayıt”ın uğursuz gedişatı sıradan bir komandanın yaşadığı enişə bənzəmir. Sanki bütün problemlər komandanın Konfrans Liqasına vəsiqə qazanmasından sonra başladı. Sanki Riad Rəfiyev bu uğurun ardından Samir Abasovu cəzalandırmaq sevdasına düşdü. Çünki diqqət etsəniz, ötən mövsüm komandanın uğurunda baş məşqçinin adı daha çox ön plana çəkilirdi və nəticənin böyük bir hissəsi Abasovun payına yazılırdı. Görünür bu, Rəfiyevi bir xeyli qəzəbləndirib. Elə bu səbəbdən bir anda klubda durum dəyişdi. Bəlkə klub rəhbəri bunun baş məşqçi tərəfindən edildiyini düşündü. Abasovun mətbuatla arasının yaxşı olması səbəbindən adının daha ön planda qaldığı zənn etdi. Və sanki bunun intiqamını alaraq, onu yalnız və çətin durumda buraxdı.
Təssəvvür edin ki, hər kəs – hətta baş məşqçi də daxil avrokubok matçına qədər transferlər gözləsə də, tam əksi baş verdi. Heç göndərilən oyunçuların belə yeri dolmadı. Abasov bir neçə dəfə bu barədə açıq şəkildə narazılıq bildirib. O, danışdı, danışdı və nəhayət susdu. Çünki qulaq asan yox idi.
“Sumqayıt” hazırda şəxsi eqonun, kibirin enişini yaşayır. Rəfiyevin ad davası, nüfuz dərdi o boyda şəhərin komandasını çətin duruma salıb. İndiki durumda gedişatı təxmin etmək çətin deyil. Böyük ehtimalla eniş bir-iki turda davam etsə, Abasovla yollar ayrılacaq. Nə qədər qəribə olsa da, bu ayrılıq şablon uğursuz baş məşqçinin göndərilməsi kimi yox, tamamən planlı, şəxsi eqo üzərindən baş verəcək.
Riad Rəfiyev yalnız Sumqayıt üçün yox, Azərbaycan futbolu üçün də arzuolunmaz simadır. Onu adı bu günə qədər bir çox mənfi hallarda çəkilib. Bundan sonra da azarkeşlərin, futbol ictimaiyyətinin yadında ancaq bu şəkildə qalacaq. Heyfislənəsi durum isə Sumqayıt kimi futbol şəhərinin komandasının belə bir şəxsin əlində qalmasıdır. Bundan sonra əsl söz “Sumqayıt” azarkeşlərindədir. Öz sevimli klublarını necə görmək istədiklərinə artıq onlar qərar verəcək. Ya şəhərin komandasını birdəfəlik xilas edəcəklər, ya da baş məşqçi dəyişikliyinə razı olub problemlərin üstünü örtəcəklər.
Həsən Quluzadə