“Fernandu Santuşun göndərilməsi əlavədən kompensasiya ödəmək deməkdir. Mən əvvəldən demişdim ki, məşqçinin göndərilməsindən öncə hazırlanan strategiyada kimin yerinin harada olacaq bunu bilmək lazımdır. Bu məsələlər müəyyənləşdikdən sonra qərarlar verilməlidir. İnanın ki, Santuşu göndərmədən öncə fikirləşməli olduğumuz məsələlər var. Vəziyyətə daha geniş baxmaq lazımdır”.
Bu sözləri İdmanxeber.az saytına azərbaycanlı məşqçi Adul Şükürov milli komandadının baş məşqçisi Fernandu Santuşun postunda saxlanılması barədə danışarkən deyib. O, daha sonra belə davam edib:
“Biz ilk növbədə millidə oynayacaq futbolçu yetişdirmək barədə fikirləşməliyik. Santuşu gətirməklə və ya saxlamaqla rəhbərlik fikrini bildirdi. Buna səs verən adamlar da bəllidir. Biz vaxtdan düzgün və səmərəli istifadə etməliyik. Əsas məsələ futbolçu yetişdirməkdi Buna fokuslanıb qarşıya çıxan maneələri dəf etməliyik. Bəli, milliyə cavan, enerjili bir məşqçi təyin olsaydı, sonuncu olmamaq şansımız artardı. Ancaq bu, köklü dəyişiklik deyil.
Bu gün bizə lazım olan klublarda Azərbaycanlı futbolçuların daha çox şans qazanmasıdır. Çempionatın səviyyəsi yüksək qalmalıdır ki, oyunçular Avropa ölkələrinə gedib təcrübə toplasın və yığmaya yüksək səviyyədə gəlsin. Gəlin milli komandada çıxış edən futbolçuların performansına baxaq. Görək onların arasında Avropa arenasında nəticəyə təsri edə biləcək neçə oyunçu görərik? Bütün diqqəti buna verməli, belə problemləri həll etməliyik”.
Həsən Quluzadə