Xorvatiyanın “Dinamo” (Zaqreb) klubunda çıxış edən Azərbaycan millisinin futbolçusu Mahir Emreli “Sportske” nəşrinə müsahibə verib.
İdmanxeber.az-ın məlumatına görə, 26 yaşlı futbolçu Zaqreb təmsilçisinin bir hissəsi olmaqdan məmnun olduğunu bildirib:
“Özümə inanıram, burada qalmaq və iz qoymaq istəyirəm. Komandaya layiq olduğumu sübut etməliyəm. Bunu ilk növbədə kluba və azarkeşlərə borcluyam. Bura niyə gəldiyimi göstərməyə çalışacağam. Yeni baş məşqçi İqor Bişçanla danışmaq imkanım olmayıb. Amma onun əfsanəvi futbolçu olduğunu bilirəm. Məşqlərimiz də əla keçir”.
Forvard ötən mövsüm icarə əsasında Türkiyənin “Konyaspor” klubunda çıxış etdiyini xatırladıb:
“Mənim üçün ən çətin mövsümlərdən biri idi. Bunu statistikadan da görmək olar. Təəssüf ki, “Dinamo”da az forma şansı əldə etdim və Türkiyəyə getmək variantı yarandı. Bunun düzgün qərar olduğunu düşünürəm. Amma orada da çətin dövr keçirdim. Çünki hazırlığı başa vurmuş, ən yaxşı formada olmayan və çoxlu məğlubiyyətlər alan komandaya keçmişdim. Uyğunlaşmağa da vaxtım yox idi. Hazırda buradayam və ümid edirəm ki, “Dinamo”da məni yaxşı günlər gözləyir”.
Qeyd edək ki, Mahir Emrelinin Zaqreb təmsilçisi ilə müqavilə müddəti 2026-cı ilin yayına qədərdir.