Azərbaycan kubokunun final matçı çərçivəsində baş tutan “Keşlə” – “Qəbələ” matçı sonrası (1:0) paytaxt təmsilçisinin hücumçusu Pərdis Fərcad Azad əməkdaşımızın suallarını cavablandırıb.
İdmanxeber.com-a müsahibə verən matçın qəhrəmanı, əvvəlcə qarşılaşma haqda danışdı:
– Çox çətin oyun keçdi. Qarşılaşmanın son anlarında gücümüz tüşənmişdi. Rəqibin hücumçuları çox yaxşı mübarizə aparırdı. Lakin əlimizdən gələni etdik ki, kuboku qazanaq.
– Azərbaycan kubokunu qazanacağınıza inanırdınız?
– Əlbəttə. Baş məşqçimiz Yuri Maksimov bizi oyuna elə motivasiya edir ki, bütün görüşlərə qələbə əzmi ilə çıxırıq.
– İlqar Qurbanovun qırmızı vərəqə aldığı epizoda necə şərh verərdin?
– İlqar bizim qardaşımızdı. Düzünü desəm, epizodu görmədim. Sadəcə baxdım ki, futbolçular eyni yerə toplaşıb, ardınca İlqara qırmızı vərəqə çıxdı.
– “Keşlə” Azərbaycan kubokunu qazanmağı haqq edirdi?
– Əlbəttə, qazanmışıqsa, deməli bizim haqqımız idi. Biz “Sumqayıt” səddini aşanda, düşünürdük ki, Azərbaycan kubokunu qazanacağıq.
– Mövsümün ikinci hissəsini yaxşı tərzdə keçirdin. Səni daha iddialı klubda görə bilərik?
– İnşallah, gözləyək. Komandalar var ki, məni öz heyətlərində görmək istəyirlər.
– Sirr deyilsə, adlarını açıqla…
– Olar, bu suala cavab verməyim?
– Əlbəttə, olar. Bəs “Keşlə”də necə, qalmağı düşünürsən?
– Elə ilk növbədə “Keşlə”də qalmaq istəyirəm. Zaur Axundovla söhbətimiz olacaq.
– Qalib olduğunuz üçün 5000 manat civarında mükafat alacağınız deyilir…
– Qalib olduğumuz üçün “premya” mütləq olacaq. Min bərəkət (gülür)