Bu gün UEFA Avropa Liqasının pley-off mərhələsi çərçivəsində Tofiq Bəhramov adına Respublika stadionunda “Neftçi” ilə Serbiya “Partizan”ı arasında cavab oyunu keçiriləcək. Azerisport.az xəbər verir ki, Azərbaycan təmsilçisi oyun öncəsi azarkeşlərinə müraciət ünvanlayıb.
Müraciətdə bildirilir: “Azarkeşlərdən xahiş edirik ki, baş verə biləcək hər hansı təxribata uymasınlar.
UEFA Avropa Liqasının 3-cü təsnifat mərhələsi çərçivəsində keçirilmiş “Neftçi” – “Çixura” (Gürcüstan) matçında qonaq komandanın azarkeşləri tərəfindən törədilən təxribat xarakterli halların qarşısı iki dost ölkənin və iki klubun birgə əməyi və səyi nəticəsində alınmışdı.
UEFA Avropa Liqasının pley-off mərhələsi çərçivəsində Serbiyada təşkil olunmuş “Partizan” – “Neftçi” oyunundan sonra da baş verənlər növbəti təxribatın yaşanmasına zəmin yarada bilər. Bir daha azarkeşlərin diqqətinə çatdırırq ki, bugünkü matçda təxribata uymasınlar və komandamızı sona qədər dəstəkləsinlər”.