Avropa Liqasının birinci təsnifat mərhələsi çərçivəsində bu gün “Neftçi” səfərdə “Uypeşt”in qonağı olacaq.
İdmanxeber.com-un məlumatına görə, Bakı vaxtı ilə saat 23:00-da “Ferens Susa” stadionunda keçiriləcək oyun öncəsi paytaxt klubunun baş məşqçisi Roberto Bordin və futbolçu Emin Mahmudovun iştirakı ilə mətbuat konfransı təşkil olunub. Tədbirdə əvvəlcə oyun haqda fikirlərini bildirən italiyalı mütəxəssis sonra jurnalistlərin suallarını cavablandırıb:
“Bakıdakı kimi, burada da asan olmayacaq. Matça 3:1 hesabı ilə öndə başlayacağıq, amma bizi güclü komanda ilə çətin oyun gözləyir. Bakı ilə müqayisədə burada hava normaldır və bu hər iki komanda üçün daha yaxşı oynamağa şərait yaranacaq. Rəqib var gücünü ortaya qoyacaq. Buna hazır olmalıyıq. İlk oyunda buraxdığımız qol bizə yaxşı mənada təsir etdi və effektli nəticə göstərdik. Ümid edirəm, uğurlu nəticəni təkrarlayacağıq”.
Ardından Emin Mahmudov fikirlərini açıqlayıb: “Əlbəttə, ağır oyun olacaq. Çünki rəqib fiziki baxımdan güclüdür. Biz öz oyunumuzu göstərib, uğurlu nəticə qazanmağa çalışacağıq. Matça tam köklənmişik. Nə qədər çətin olsa belə, çıxıb oyunumuzu oynayacağıq”.