Milli komandaların oyunları ilə əlaqədar Premyer Liqada yaranan fasilədə təlim-məşq toplanışı üçün Ukraynaya yollanan “Qəbələ” hazırlıqlara start verib.
İdmanxeber.com-un məlumatına görə, sentyabrın 1-də 6 günlük hazırlıqlara başlayan “qırmızı-qaralar” Odessa toplanışı çərçivəsində ilk məşqinə çıxıb. Səfərin ilk günündə 1 məşqlə kifayətlənən komandanın hazırlığında milli üzvləri iştirak etməyib.
“Çerno More” otelinin idman zalında keçirilən hazırlıq fiziki çalışmalardan ibarət olub. Klubun saytının verdiyi xəbərə görə, Roman Qriqorçukun yetirmələri bu gün – toplanışın ikinci günündə də 1 məşqlə kifayətlənəcək.
“Qəbələ” hazırlığın son günü – sentyabrın 6-da “Çernomorets” stadionunda eyniadlı komanda ilə yoldaşlıq oyunu keçirəcək. Qarşılaşma Bakı vaxtı ilə saat 20:30-da başlayacaq.